द्वन्द्वको असर : रूसमा महंगी बढ्यो
युक्रेनमाथि रूसले हमला गरेसँगै सर्वसाधारण युक्रेनीको जीवन त कष्टकर नै बनेको छ तर युद्धको असरमा रूसमा पनि गहिरो देखिएको छ । युक्रेनको युद्धको विरोधमा एउटा रूसी समूह खुलेरै सडकमा उत्रिएको छ भने अधिकांश मानिस मंहगी र अभावसँग जुधेका छन् ।
युक्रेनमा रूसी हमलापछि पश्चिमा देशहरूले मस्कोमाथि विभिन्न प्रतिबन्ध लगाएका छन् । रूस निर्यात हुने सामाग्रीहरूमा प्रतिबन्ध लाग्दा त्यसको मारमा सबैभन्दा बढी सर्वसाधारण रूसी परेका छन् । राष्ट्रपति भ्लादिमिर पुटिनले युक्रेनलाई निशस्त्रीकरण गरेको भन्दै रूसी कदमको बचाउ गरे पनि पश्चिमा देशहरूले पुटिनले युद्धका बहाना गरेकोे बताउँदै आएका छन् ।
रूसमाथि पश्चिमा देशहरूले वित्तिय दण्ड दिएका छन् । अन्तर्राष्ट्रिय कम्पनीले त्यहाँको सञ्चालन स्थगित गर्दा रुसीहरूको दैनिकीमा असर परेको छ । जीवनयापनको खर्च बढिरहेको छ । रोजगारी गुम्ने जोखिम बढ्दो छ । धेरै वित्तीय संस्थाहरू रूसबाट अलग भएका छन् ।
पकाउने तेल, चिनी र अन्य आधारभूत उत्पादनको मूल्य बढिरहेको छ । उपभोत्ता मूल्य २ दशमलब २ प्रतिशतले बढेको छ । मस्को र अन्य शहरका पसलहरूले औषधि र अन्य केही वस्तुको बिक्रीमा रोक लगाएको छ ।
२४ फेब्रुवरीदेखि सुरु भएको रूसी हमलापछि रूसी मुद्रा रूबलको मूल्यमा गिरावट आएको छ । २० फेब्रुवरीसम्म ५ हजार ५०० रूबलमा अर्डर गरेको किराना सामानको मूल्य ८ हजार रूबल रहेको इयूका बासिन्दा जानले बताएका छन् । त्यस्तै चिनीको मूल्य २० प्रतिशत बढेको छ ।
