अब नेपाली आकाशमा पनि इन्टरनेटको सुविधा
विदेशी वायुसेवा कम्पनीहरुले नेपाली आकाशमा उडान गर्दा दूरसञ्चार सेवा उपयोग गर्न पाउने भएका छन् ।
नेपाल दूरसञ्चार प्राधिकरणले नेपाल नागरिक उडड्यन प्राधिकरणसँगको समन्वयमा विदेशी वायुसेवा कम्पनीलाई आकाशमा नै उक्त सेवा प्रयोग गर्ने अनुमति दिन लागेको हो ।
दूरसञ्चार प्राधिकरण सञ्चालक समितिको बैठकले उक्त निर्णय गरेसगैँ नेपाली आकाशमा विदेशी एयरलाइन्सले इन्टरनेट तथा मोबाइल फोनको प्रयोग गर्न पाउने छन् ।
दश हजार फिटभन्दा माथिको आकाशमा इन्टरनेट सेवा प्रदान गर्ने नेपाल दक्षिण एशियामा भारत र अफगानिस्तान पछि तेस्रो देश बनेको छ ।
प्राधिकरणले विदेशी वायुसेवा कम्पनीले माग गरेमा दश हजार फिट उचाइमा उक्त सेवा प्रयोगको अनुमति दिनसक्ने निर्णय गरेको प्राधिकरणका प्रवक्ता सन्तोष पौडेलले जानकारी दिए ।
उनका अनुसार अन्तर्राष्ट्रिय नागरिक उडड्यन सङ्गठन (आइकाओ) बाट अनुमति प्राप्त जुनसुकै एयरलाइन्सले पनि उक्त सुविधा पाउनेछन् ।
प्राधिकरणमा ३ विदेशी वायुसेवा कम्पनीले आकाशमा इन्टरनेट सेवा सञ्चालनका लागि आवेदन दिएका थिए ।
यसअघि भारत र अफगानिस्तानले दश हजार फिटभन्दा माथिको आकाशमा इन्टरनेट सेवा प्रदान गर्दै आएका छन् । उक्त दुई देशपछि यो सेवा उपलब्ध गराउने नेपाल दक्षिण एशियाकै तेस्रो देश बनेको छ । रासस
