डाक्टर्स एघारले जित्यो मैत्रीपूर्ण टी–२०

शारीरिक तन्दुरुस्ती र आपसी मेलमिलापको सन्देशसहित आयोजित भेट्रान्स एघार र डाक्टर्स एघार बीचको मैत्रीपूर्ण टी–२० क्रिकेट डाक्टर्स समूहले जितेको छ । मूलपानी अन्तर्राष्ट्रिय क्रिकेट रंगशालामा शनिबार आयोजित प्रतियोगितामा डाक्टर्स एघारले टस जिती भेट्रान्सलाई ब्याटिङको निम्तो दिएको थियो । भेट्रान्सले २० ओभरमा सबै विकेट गुमाउँदै दिएको १२८ रनको चुनौती डाक्टर्स एघारले १७.२ ओभरमा पाँच विकेट नोक्सानीमा पुरा गरेको हो ।

भेट्रान्स टिमको नेतृत्व नेपालका पूर्व राष्ट्रिय खेलाडी किरण राणा र डाक्टर्सको डा. कृष्ण बुढाथोकीले गरेका थिए । भेट्रान्सको लागी हेमन्त सापकोटाले २५ बलमा ५ चौकासहित सर्वाधिक ३८ रन, उज्जवल डोटेलले १३ बलमा १७ रन र धिरेन्द्र पन्तले ९ बलमा १६ रन बनाए । डाक्टर्स टिमको तर्फबाट अर्पण तिमिल्सिनाले ४ विकेट र सुरज राइले २ विकेट लिए ।

भेट्रान्सलाई हराउन निर्मल हुमागाई र अविरल बाराकोटीबिचको ९० रन साझेदारी नै मुख्य कारक बन्यो । अविरलले २३ बलमा ९ चौका प्रहार गर्दै ५० रन बनाए भने निर्मलले २५ बलमा ४ चौका प्रहार गर्दै ३३ रन बनाए । सुरज राइले १५ रनको अविजित पारी खेले । बलिङमा भेट्रान्सको तर्फबाट धिरेन्द्र पन्तले २ विकेट लिए भने किरण राणा र हेमन्त सापकोटाले समान १/१ विकेट लिए । भेट्रान्स टिममा सनराइज बैंकका प्रमुख कार्यकारी अधिकृत सुमन शर्मा समेत सहभागी थिए ।

४ विकेटसहित बलिङमा उत्कृष्ट प्रदर्शन गरेका डाक्टर्सका अर्पण तिमिल्सिना ‘म्यान अफ दि म्याच’ घोषित भए । नेपाल रेडियोलोजिष्ट संघका अध्यक्ष प्रोफेसर डा. हेन्सन खड्काको प्रमुख आतिथ्यतामा भएको प्रतियोगितामा नेपालका पूर्व राष्ट्रिय क्रिकेट खेलाडी र कमेन्टेटरहरूको समेत सहभागिता थियो । ओएसिस क्रिकेट एकेडेमीका संचालक बालकृष्ण शर्माको संयोजकत्वमा आयोजित प्रतियोगितामा सिद्धार्थ मेडिटेक प्रालिका कार्यकारी निर्देशक अनिल श्रेष्ठ लगायतको समेत उपस्थिती थियो ।