आयरल्यान्डविरुद्ध नेपालको सानदार शुरुवात
टी–२० शृंखलाअन्तर्गत नेपालले आयरल्यान्डविरुद्ध सानदार शुरुवात गरेको छ । टस हारेर ब्याटिङ गरेको टेष्ट राष्ट्र आयरल्यान्डले पावर प्ले (६ ओभर)को समाप्तिमा ३ विकेट गुमाएर ३५ रन जोडेको छ । पहिलो ओभरको चौथो बलमै कमलसिंह ऐरीले आयरल्यान्डका विष्फोटक ओपनर ब्याटर पल स्टर्लिङलाई बोल्ड गरेका थिए ।
तेस्रो ओभरको अन्तिम बलमा जितेन्द्र मुखियाले ग्यारेथ डेलानीलाई कट एण्ड बल गरे । चौथो ओभरको चौथो बलमा अविनाश बोहोराले आयरल्यान्डका अर्का ओपनर एण्डी बाल्बिर्नीलाई १९ रनको स्कोरमा बोल्ड गरे ।
शृंखलाको अघिल्ला दुई खेलमा एक जित र एक हारको नतिजा निकालेको नेपाली टोलीमा आज अविनाश बोहोरो, कुशल मल्ल र कुशल भुर्तेल टिममा फर्किएका छन् ।
युएईसँगको खेलमा सुरुवाती ११ मा रहेका साहव आलम, विवेक यादव र आरिफ शेखलाई आराम दिइएको छ । मल्ल र भुर्तेलले यसअघिका दुई खेल खेलेका थिएनन् ।
नेपालले शृंखलाको पहिलो खेलमा ओमानलाई ६ विकेटले पराजित गरेको थियो भने दोस्रो खेलमा ओमानसँग २५ रनको हार ब्यहोरेको थियो ।
नेपालले आयरल्यान्डमाथि ठूलो अन्तरको जित हासिल गरेको खण्डमा शृंखला जित्ने सम्भावना छ । आजै केही बेरअघि सम्पन्न खेलमा ओमानले युएईलाई ७ विकेटले पराजित गरेपछि उपाधिमा नेपाल र आयरल्यान्ड दुवैको अवसर खुलेको हो । ३ खेलबाट यूएईको ४ अंक छ भने आयरल्यान्ड र नेपालको २–२ अंक छ ।
यो पनि
श्रीलंकाविरुद्धको टी-२० शृंखलामा अष्ट्रेलिया विजयी
नेपाल युएईसँग पराजित
