पहिलो गीत गाउँदा २५ रूपैयाँ पाएकी थिइन् लताले
भारतकी सुप्रसिद्ध गायिका लता मंगेशकरको आइतबार बिहान निधन भयो । मुम्बईको ब्रीच क्याण्डी अस्पतालमा उपचारको क्रममा लताको ९२ वर्षको उमेरमा निधन भएको हो । निधनपछि उनको सांगीतिक जीवनका विभिन्न किस्साहरूमाथि चर्चा भइरहेको छ । भारतीय सञ्चार माध्यमका अनुसार लताले पहिलोपटक स्टेजमा गीत गाउँदा पारिश्रमिकस्वरूप १५ रूपैयाँ पाएकी थिइन् । उनले यसलाई आफ्नो पहिलो कमाई मानेकी थिइन् ।
लताको आवाज
संगीतकार गुलाम हैदरले १८ वर्षीया लतालाई सुनेपछि उनलाई त्यस युगका सफल फिल्म निर्माता शशिधर मुखर्जीसँग परिचय गराए । शशिधरले यो आवाज एकदमै पातलो छ, काम नलाग्ने बताए । त्यसपछि मास्टर गुलाम हैदरले लतालाई चलचित्र ‘मजबूर’ को ‘अंग्रेजी छोरा चला गया’ गीतमा गायक मुकेशसँग गाउने मौका दिएका थिए । यो लताको पहिलो ठूलो ब्रेक थियो, त्यसपछि उनलाई कामको कमी भएन।
फिल्ममा स-साना भूमिका
लता मंगेशकरका बुबा शास्त्रीय संगीतका ठूलो फ्यान थिए । त्यसैले सायद उनी फिल्ममा लताको विरुद्धमा थिए । उनको बुबाको मृत्युपछि परिवारको आर्थिक अवस्था नाजुक भयो । लता मंगेशकरले मराठी र हिन्दी फिल्ममा साना भूमिका खेल्न थालिन् । मास्टर विनायकले उनलाई र आशा भोस्लेलाई उनका केही फिल्ममा भूमिका र गीत गाउने मौका पनि दिए ।
गीत रेकर्ड गर्नुअघि आइसक्रिम
गीत रेकर्ड गर्नुअघि लताले आइसक्रिम खान्थिन् । उनले अचार, खुर्सानीजस्ता कुरालाई सधैं बेवास्ता गरिन् । उनको आवाजले सबैलाई मोहित पार्छ । सन् १९७४ मा लन्डनको रोयल अल्बर्ट हलमा प्रदर्शन गर्ने उनी पहिलो भारतीय थिइन् ।
यो पनि
