नेपालमा भेटियो विश्वमै दुलर्भ सेतो गिद्ध
विश्वमै दुर्लभ मानिएको सेतो रंगको गिद्ध पहिलोपटक नेपालमा भेटिएको छ । नवलपुरको गिद्ध जटायु रेस्टुरेन्टमा देखिएको हिमाली गिद्ध निख्खर सेतो रंगको छ । चराविद्हरुले यसलाई अन्यन्तै दुर्लभ र अकल्पनिय बताएका छन् । यस्तो गिद्ध यसअघि कहिल्यै नदेखिएको उनीहरुको दाबी छ । आँखाको रौँ र आँखा मात्र कालो भएको यो गिद्धको अन्य भाग पुरै सेतो र कहीँकहीँ मात्र थोरै खैरो छ ।
वंशाणुगत गुणमा आएको परिवर्तन, शरीरलाई कालो खैरो बनाउने तत्वको कमी वा जलवायु परिवर्तनका कारण यसो भएको हुनसक्ने चराविद्हरु बताउँछन । वाइल्ड लाइफ फोटोग्राफर पेम्बा शेर्पा, सुगम ताम्राकार, ताहिर अहमद, राजेन्द्र महर्जन र नेचर गाइड प्रेम महत्तोको टोलीले पहिलोपटक सेतो रंगको हिमाली गिद्ध देखेका हुन् ।
यसबारेको हल्ला फैलिएपछि पछिल्लोसमय गिद्धको तस्बिर खिच्न जटायु रेष्टुरेष्ट पुग्नेहरुको घुइचो बढेको छ । जटायु रेष्टुरेण्ट स्थापना भए पछि सन २०११, सन २०२० र अहिले गरेर तीन पटक फरक–फरक जातका दुर्लभ गिद्ध देखिएका छन् ।
