सडकमै दाहसंस्कार
भारतको राँचीमा कोरोना भाइरस (कोभिड १९) कारण मृत्यु हुनेको संख्या दिनदिनै बढ्न थालेपछि शव व्यवस्थापनमा समस्या भएको छ ।
पछिल्ला १० दिनमा भारतको राँचीमा कोरोनाका कारण मृत्यु हुनेको संख्या अचानक बढ्न थालेपछि शव जलाउनका लागि ठाउँको अभाव हुन थालेको हो । आईतवार ६० जनाको शवको दाहसंस्कार भएको र यी मध्ये १२ शव कोरोना संक्रमितको रहेको बताइएको छ । मानिसले शव जलाउनको लागि धेरै समय कुरे पनि पालो नआएपछि उनीहरुले पार्किङ वा हिँड्ने सडकमै शव राखेर जलाएका हुन् ।
यी सबैको दाहसंस्कार सामूहिक चिता बनाएर गरिएको हो । भारतमा हिजो (आईतवार) अहिलेसम्मकै सबैभन्दा धेरै १ लाख ६९ हजार ९१४ जनालाई कोरोना संक्रमण भएको थियो भने ९०४ जनाको निधन भएको छ ।
भारतमा अहिलेसम्म १ करोड ३५ लाख २७ हजार ७१७ जनालाई कोरोना संक्रमण भएको छ भने १ लाख ७० हजार मानिसको ज्यान गएको छ ।
