नयाँ वर्षमा मात्र फुल्ने सहलेश फूल हेर्न दर्शनार्थीको भिड
धार्मिक पर्यटकीय स्थलको रूपमा रहेको सिरहाको सहलेश फूलबारीमा रहेको रुखमा १ वैशाखमा मात्र फुल्ने फूल हेर्न र पूजाअर्चना गर्न दर्शनार्थीहरूको बुधबार बिहानैदेखि भिड लागेको छ ।
फूलबारीभित्र रहेको राजा सहलेश र मालिनीको गहवर (मन्दिर) मा पूजाअर्चना गर्न र मन्दिरसँगै टाँसिएको हारम जातको रूखमा हरेक वर्ष नयाँ वर्षमा मात्र फुल्ने जनविश्वास छ ।
तराईका पासवान जातिको इष्टदेव मानिने सहलेशको पूजा गर्नाले मनोकांक्षा पूरा हुने, सन्तान प्राप्ति, चर्म रोगलगायतका रोगब्याधि नलाग्ने जनविश्वास छ । फूलबारीभित्र दुर्लभ जातिका जडीबुटी खोज्न भारतको बिहार, पश्चिम बंगाल, नेपालको सिरहा, सप्तरी, उदयपुर, धनुषालगायतका जिल्लाबाट हजारौंको संख्यामा दर्शनार्थीहरू आउने गर्दछन् । हरेक वर्षको १ वैशाखमा मात्र पूजा हुने सहलेश फूलबारीमा भव्य मेलासमेत लाग्ने गर्दछ ।
सहलेश गाथामा उल्लेख गरिएअनुसार तेह्रौं शताब्दीका लोकनायक सहलेश र विराट राजाकी छोरी मालिनीबीच प्रगाढ प्रेम सम्बन्ध रहे पनि प्रेम असफल भएपछि सहलेशको प्रतीक्षा गर्दै मालिनी मालाको रूपमा १ वैशाखमा फुल्ने गरेको सहलेश गहवरका पुजारी हरिसिंहदेव दनुवारले बताए ।
१२ बिघा क्षेत्रफलमा फैलिएको सहलेश फुलबारी मेला कोरोना संक्रमणका कारण गत वर्ष नलागेकाले यस वर्ष विगतको तुलनामा मेला भर्न आउनेहरुको संख्या बढ्न सक्ने अनुमान गरिएको छ ।
यो पनि…
लालीगुराँसले ढकमक्क घोडेपानी पर्यटकको पर्खाइमा
प्रचुर सम्भावना बोकेको गुमनाम ‘इन्द्रेणी झरना’
