रूससँग वार्ताका लागि जेलेन्स्कीले के भने ?
युक्रेनका राष्ट्रपति भोलोदिमिर जेलेन्स्कीले आफ्नो देशले आक्रमणकारी रूसी सेनालाई ‘शक्तिशाली धक्का’ दिएको दाबी गरेका छन् ।
‘हाम्रा वीर सशस्त्र सैनिकहरूले शत्रूलाई शक्तिशाली धक्का दिएका छन् । उनीहरूतर्फ उल्लेख्य क्षति भएको छ,’ सम्बोधनका क्रममा जेलेन्स्कीले भने ।
बीबीसीका अनुसार उनले युक्रेनमा आक्रमण सुरु भएयता १६,००० रूसी सेनाले ज्यान गुमाएको दाबी गरे पनि रूसले आफ्ना १,३५१ सैनिकको मृत्यु भएको बताएको छ ।
‘म हाम्रा रक्षकहरूप्रति आभारी छु जसले आक्रमणकारीलाई आँधी नआए पनि समुद्र शान्त हुँदैन भन्ने देखाएका छन्,’ जेलेन्स्कीले भने ।
‘रूसी कदमसँग प्रतिरोध गरेर हाम्रा रक्षकहरूले रूसी नेतृत्वलाई वार्ता जरुरी छ भन्ने सन्देश दिएका छन् ।’ उनले मारिऊपोलमा दशौँ हजार मानिसहरू खाना, पानी र न्यानोको अभावमा फसेको भन्दै उनीहरूको अवस्था भने खराब हुँदै गएको उल्लेख गरेका छन् ।
‘त्यो शहरको अवस्था दुःखद् छ साँच्चिकै दुःखद् । रूसी सेनाले त्यहाँ कुनै पनि मानवीय सहायता लैजान दिएको छैन,’ जेलेन्स्कीले भने ।
मारिऊपोलमा रूसी आक्रमणमा परेको नाटकघरमा ३०० जनाको मृत्यु भएको सरकारी अधिकारीले बताएका छन् । रूसले आक्रमण गर्दा उक्त भवनमा सयौँ मानिसहरूले आश्रय लिइरहेका थिए । तर रूसले त्यहाँ आफूले आक्रमण नगरेको दाबी गरेको छ ।
यो पनि…
युक्रेनको युद्ध क्षमतामा कमी ल्याउन सफल भएको रूसको दाबी
रूसी पर्वतारोहीमाथि प्रतिबन्धन लगाउन नेपाललाई युक्रेनको अनुरोध
रूसले अब कस्तो हतियार प्रयोग गर्न सक्छ ?
