किन छ नेपालमा साउथ इण्डियन फिल्मको क्रेज ?
‘बाहुबली सिरिज’, ‘केजीएफ’, ‘पुष्पा’ लगायतका फिल्मले नेपालमा राम्रो व्यापार गर्न थालेपछि पछिल्लो समय साउथ इन्डियन फिल्मको क्रेज बढ्दो छ । बाहुबली सिरिजबाट साउथ इन्डियन फिल्मका दर्शकलाई नेपालमा बढाउन सफल निर्देशक एसएस राजामौली निर्देशित फिल्म ‘आरआरआर’ आउँदो शुक्रबारबाट प्रदर्शनमा आउन लागेको छ ।
फिल्मको अग्रिम बुकिङ सोमबार नै खुलेको छ । यति छिटो कुनै फिल्मको बुकिङ नेपालमा खुलेको यो पहिलो हुनसक्छ । प्रायः बुधबार बुकिङ खोलिने भए पनि विशेष फिल्मको मंगलबार नै खोल्ने गरिन्छ । हल सञ्चालकहरू दर्शकमाझ प्रतीक्षित रहेको फिल्महरू प्रायः छिट्टै बुकिङ खोलिने बताउँछन् । आरआरआरको टिकट बुकिङमै खरिद गर्नुपर्ने हुन्छ ।
टिकट नै खरिद गर्नुपर्ने अवस्थामा पनि मल्टिप्लेक्सहरूमा सबै शोहरू शुक्रबार अगाडि नै सोल्ड आउट हुने सम्भावना बढेको छ । पछिल्लो समय साउथ इन्डियन फिल्मका दर्शक बढिरहेको समयमा नेपाली दर्शकलाई साउथ इन्डियन फिल्मको बानी लगाउने निर्देशक राजामौलीकै फिल्म ‘आरआरआर’ रिलिज हुने भएकाले पनि नेपालमा यसको क्रेज बढेको हो ।
महँगोमा खरिद
फिल्म नेपालमा ए एट फिल्मसले अहिलेसम्मकै महँगो रकममा ल्याइएको बताइएको छ । कम्पनीले जनाएअनुसार फिल्म एक सय २१ बढी पर्दामा शो हुनेछ । कम्पनीका वितरण प्रमुख नवीन शाक्यले शो आजभोलिमा अझै बढ्ने बताए । ‘फिल्मको लम्बाइ तीन घन्टा रहेकाले पनि केही शो घटेका छन् । यद्यपि, आउँदो शुक्रबारसम्म शो बढ्ने छ, किनकि सम्पूर्ण हलले फुल शो पब्लिस गरेका छैनन्,’ नवीनले भने ।
लागतका कारण चर्चा
लागत चार सय करोड बढी भएका कारण पनि आरआरआर चर्चामा छ । निर्देशक राजामौलीले ‘बाहुबली’ सिरिजपछि निर्देशन गरेको मात्र नभई साउथका दुई स्टार जुनियर एन्टीआर र रामचरणको अभिनय रहेकाले पनि यो प्रतीक्षित छ ।
साथै, यसमा बलिउड स्टार अजय देवगन र आलिया भट्ट पनि छन् । यसैले गर्दा यो प्रतीक्षित फिल्म बिग बजेटको फिल्म बनेको अनुमान छ । बाहुबलीपछि दर्शकमाझ आउन लागेका निर्देशक राजमौलीको यस फिल्मबाट धेरै नै अपेक्षा गरिएको छ ।
यसबाहेकका प्रतीक्षित फिल्महरू
नेपालमा साउथ इन्डियनका बहुप्रतीक्षित फिल्महरू एक पछि अर्को गर्दै रिलिज डेट तोकिरहेका छन् । फिल्म ‘राधे श्याम’को प्रदर्शन मिति कोरोनाका कारण पछि सारिएको छ । फिल्ममा सुपरस्टार प्रभास र अभिनेत्री पूजा हेग्डेको मुख्य भूमिका रहेको छ ।
यस्तै, साउथकै अर्का स्टार अजित कुमार अभिनित फिल्म ‘भलिमाई’को प्रदर्शन मिति पनि जनवरी १३ बाट पछि सारिएको छ । यसैगरी, अप्रिल १४ तारिखमा रिलिज हुन लागेको साउथ स्टार यशको मुख्य भूमिका रहेको चलचित्र ‘केजीएफ २’ पनि दर्शकको ठूलो भीडलाई हलसम्म तान्न सक्ने चलचित्र हो । यो चलचित्रको पहिलो शृंखलाले बक्स अफिसमा तहल्का मच्चाएको थियो । यसको दोस्रो सिरिज दर्शकका लागि सर्वाधिक प्रतीक्षामा छ ।
यो पनि
किन चर्चामा छ ‘दि कश्मिर फाइल्स’
यसकारण हटाए प्रकाशले ‘पिर’बाट लडाकु देहव्यापारमा संलग्न दृश्य
