युक्रेन पछि नहट्ने
युक्रेनका राष्ट्रपति भोलोदिमिर जेलेन्स्कीले आफ्नो देशले रूसविरुद्धको लडाइँ नछोड्ने बताएका छन् । बेलायतको संसद् हाउस अफ कमन्सलाई सम्बोधन गर्दै जेलेन्स्कीले युद्ध अन्त्य नहुने बेलासम्म युक्रेन रूसविरुद्ध लडिरहने प्रतिबद्धता जनाए ।
‘हामीले आत्मसमर्पण गर्दैनौँ । पछि हट्दैनौं । हाम्रो भूमिका लागि निरन्तर लडिरहनेछौं’ भिडियो सम्बोधनमा राष्ट्रपति जेलेन्स्कीले भने ।
रूसविरुद्धको लडाइँमा आफूहरू जंगल, मैदान, समुद्री किनार र सडकबाटसमेत लड्न तयार रहेको उनले बताए । जेलेन्स्कीले सम्बोधन गर्नुअघि बेलायतले सन् २०२२ को अन्त्यसम्म रूसी तेलको आयात नगर्ने बताएको थियो ।
‘कारबाही सुस्त बन्दैछ’
किभले पछिल्लो २४ घण्टामा शत्रूले आफ्नो आक्रामक कारबाहीको गतिलाई सुस्त बनाएको दाबी गरेको छ । रूसी सेनामाथि सशक्त प्रतिकार गरेको बताइरहेका बेला युक्रेनको पछिल्लो भनाइ आएको हो । रूसी सेनाले मिसाइल र बम हमलाको सहारा लिएको पनि युक्रेनले जनाएको छ ।
‘‘पछिल्लो २४ घण्टामा शत्रूले आफ्नो आक्रामक कारबाहीको गतिलाई सुस्त बनाएको छ । मुख्यतया नागरिक पूर्वाधारमा मिसाइल र बम हमलाको सहारा लिएको छ,’ युक्रेनको सशस्त्र फौजले एक विज्ञप्तिमा भनेको छ ।
रूसी सेनाले २४ फेब्रुवरीदेखि युक्रेनमा हमला गरिरहेको छ । रूसले किभ, सुमी, खारकिभ, मारिओपोललगायतका शहरलाई निरन्तर घेरा हालेको पनि युक्रेनी सेनाले जनाएको छ ।
यो पनि…
रूसले युक्रेनमा किन आक्रमण गर्यो ?
रूस-युक्रेन द्वन्द्व : यी हुन् पछिल्ला प्रमुख घटना
