छालाको हेरचाहको प्रसंग आउँदा घुँडा तथा कुहिना प्राथमिकतामा पर्दैन । शरीरको यो भाग अन्यभन्दा रुखो हुन्छ । घुँडा तथा कुहिनाको भाग कालो हुनुको कारण बढ्दो उमेर र चाउरीपना पनि हुन सक्छ । महिलाहरूमा प्रायः यो समस्या हुन्छ ।

घुँडा तथा कुहिनालाई थोरै हेरचाह गर्ने हो भने पनि गोरो बनाउन सकिन्छ । यसका लागि तपाईंले घरैमा कागती, मह, ओट्स लगायतको स्क्रब बनाउन सक्नु हुन्छ । कागतीको रसमा प्राकृतिक रूपमा छाला गोरो पार्ने गुण हुन्छ । महको प्रयोगले पनि छाला चम्किलो र नरम हुन्छ । ओट्स खस्रो हुन्छ, यसले स्क्रबमा एक्सफोलिएशन एजेन्टको रूपमा काम गर्छ ।

स्क्रब बनाउन चाहिने सामग्री

– कागती
– ओट्स, एक चम्चा
– मह, एक चम्चा
– नुन, एक चिम्टि

स्क्रब बनाउने विधि

– एउटा भाँडोमा कागतीको रस निचोर्नुहोस् ।
– त्यसमा एक चम्चा मह मिसाउनुहोस् र यी दुवैलाई राम्रोसँग मिक्स गर्नुहोस् ।
– अब त्यसमा एक चम्चा ओट्स र एक चिम्टी नुन पनि मिसाएर पेस्ट बनाउनुहोस् ।
– घुँडा तथा कुहिनालाई पानीले राम्ररी सफा गर्नुहोस् ।
– अब त्यो स्क्रबलाई घुँडा र कुहिनामा लगाएर १० मिनेटसम्म मसाज गर्नुहोस् ।
– त्यसलाई हल्का तातो पानीले धोएर थपथपाएर सुकाउनुहोस् ।
– स्क्रब गरिसकेपछि एलोभेरा जेल वा मोस्चराईजरले घुँडा र कुहिनामा मोस्चराईज गर्नुहोस् ।
– राम्रो नतिजाको लागि यो प्रक्रिया हप्तामा दुईदेखि तीन पटक दोह्याउनु होस् ।