पशुपतिमा यस्तो छ तयारी (भिडियो पनि)
महाशिवरात्रिको तयारीस्वरूप पशुपति क्षेत्र झिलीमिली बत्ती र फूलले सजाइएको छ । विगतका वर्षका तुलनामा यो वर्ष महाशिवरात्रिमा पाशुपत क्षेत्रको माहोल अलि फरक छ । फूल र बत्तीको सजावटसँगै पशुपति क्षेत्रमा कोरिएका विभिन्न देवी देवताको चित्रले पनि पनि दर्शनार्थीलाई मोहित पार्छ ।
महाशिवरात्रि पर्वका अवसरमा पशुपतिनाथको मुख्य प्रवेशद्वारसहित मन्दिर परिसरलाई विशेष किसिमले सिँगारिएको छ । मन्दिर क्षेत्रका भवनहरूमा नयाँ रङ्गरोगनको काम पनि तीव्रताको साथ भइरहेको छ ।
सजावटको साथै अन्य व्यवस्थापनको कामहरू पनि धमाधम भइरहेको पशुपति क्षेत्र विकास कोषका प्रवक्ता रेवतीरमण अधिकारीले जानकारी दिए । ‘भक्तजनहरूलाई दर्शनका लागि बिहान ३ बजेदेखि चारै ढोकाबाट दर्शनको व्यवस्था मिलाइनेछ साथै विशेष पूजा बिहान र साँझमा ६ः०० बजेपछि गरिनेछ ।’
मित्रपार्क–गौरीघाट, उमाकुण्ड–दक्षिणामूर्ति, हुँदै रूद्रगाडेश्वर उत्तर ढोकाबाट एक लाइन, बत्तिसपुतली–गौशाला, त्रिभुवन अन्तर्राष्ट्रिय विमानस्थल–तिलगङ्गा, पिङ्गलास्थान–सुमार्गी भवन अगाडिबाट चार शिवालय–पञ्चदेवल हुँदै दक्षिणढोका हुँदै दक्षिणढोकाबाट दुई लाइन गरी बाहिरी रूपमा पशुपति मूल मन्दिर परिसर प्रवेश गर्न सक्ने व्यवस्था मिलाइएको छ ।
यस वर्षको महाशिवरात्रिमा पशुपतिमा तीनवटा बाहिरी मार्ग हुँदै पशुपतिनाथ मूल मन्दिर परिसरमा प्रवेश गर्न सकिने जनाइएको छ । ‘मित्रपार्क–गौरीघाट, उमाकुण्ड–दक्षिणामूर्ति, हुँदै रूद्रगाडेश्वर उत्तर ढोकाबाट एक लाइन, बत्तिसपुतली–गौशाला, त्रिभुवन अन्तर्राष्ट्रिय विमानस्थल–तिलगङ्गा, पिङ्गलास्थान–सुमार्गी भवन अगाडिबाट चार शिवालय–पञ्चदेवल हुँदै दक्षिणढोका हुँदै दक्षिणढोकाबाट दुई लाइन गरी बाहिरी रूपमा पशुपति मूल मन्दिर परिसर प्रवेश गर्न सक्ने व्यवस्था मिलाइएको छ,’ प्रवक्ता अधिकारीले जानकारी दिए ।
आवश्यकताअनुसार तिलगङ्गा राम मन्दिरतर्फ एक लाइन व्यवस्था गर्न सकिने उनले बताए । मूल मन्दिर परिसरभित्र प्रवेश गरिसकेपछि भने पाँच वटा लाइन व्यवस्थापन गर्न लागिएको छ ।
पशुपतिनाथको मन्दिरनजिकै कोर क्षेत्रमा डाक्टर, नर्स, औषधि र नेपाली सेनाको मूल स्वास्थ्य शिविर रहनेछ । सशस्त्र प्रहरी, नेपाल प्रहरी समेतका गरी करिब ६० वटा स्वास्थ्यसम्बन्धी सेवा प्रदान गरिनेछ । आपतकालिन अवस्थाका लागि एम्बुलेन्ससमेतको व्यवस्था गरिएको अधिकारीले बताए । ‘प्रत्येक दर्शनमार्गलाई पायक पर्नेगरी एम्बुलेन्स स्टेन्डबाई रहने गरी व्यवस्था मिलाइएको छ ।’
१० लाख भक्तजन आउने अनुमान
यसपटक शिवरात्रिको विशेष अवसरमा लगभग १० लाखको हाराहारीमा भक्तजन पशुपति दर्शन गर्न आउने अनुमान गरिएको अधिकारी बताउँछन् । ‘अघिल्लो वर्ष कोरोनाले गर्दा दर्शनार्थीहरूको घुइँचो कम थियो । साधु–सन्तहरूको उपस्थिति पनि धेरै थिएन, तर यो वर्ष भने ५ हजारको हाराहारीमा साधुसन्तहरू आउने अनुमान गरिएको छ,’ उनले भने ।
पशुपति क्षेत्र कानुनद्वारा नै मांस, मदिरा तथा कुनै पनि प्रकारका नशालुपदार्थ निषेधित क्षेत्र भएकाले महाशिवरात्रि पर्व समेतमा गाँजा, भाङ, जाँड, रक्सीजस्ता नशालु पदार्थहरूको बिक्री–वितरण, ओसारपसार, भण्डारण एवं प्रयोग वा सेवन नगर्न पशुपति क्षेत्र विकास कोषले सबैलाई अनुरोध गरिएको छ ।
यसैगरी, नेपाल स्काउटलगायत गरी करिब ५००० को संख्यामा स्वयंसेवकहरू परिचालन गरिनेछ । दर्शनार्थीहरूको लागि कुनै पनि पासको व्यवस्था नगरिएको कोषले जनाएको छ ।
गाँजाभाङ निषेधित क्षेत्र
हरेक वर्षजस्तै यो वर्ष पनि पशुपतिलाई गाँजा निषेधित क्षेत्र घोषित गरिएको छ । मेलामा मासु, मदिरा र गाँजा निषेध गरिएको छ । ‘पशुपति क्षेत्र कानुनद्वारा नै मांस, मदिरा तथा कुनै पनि प्रकारका नशालुपदार्थ निषेधित क्षेत्र भएकाले महाशिवरात्रि पर्व समेतमा गाँजा, भाङ, जाँड, रक्सीजस्ता नशालु पदार्थहरूको बिक्री–वितरण, ओसारपसार, भण्डारण एवं प्रयोग वा सेवन नगर्न पशुपति क्षेत्र विकास कोषले सबैलाई अनुरोध गरिएको छ,’ कोषद्वारा जारी विज्ञप्तिमा उल्लेख छ ।
प्लास्टिकको प्रयोगमा पनि रोक
पूजा गर्न जाँदा प्लास्टिक ब्याग तथा प्लास्टिक निर्मित सामग्रीको प्रयोग नगर्न पशुपति क्षेत्र विकास कोषले अनुरोध गरेको छ । साथै, मेला क्षेत्रमा सेवा प्रदान गर्ने सबै संस्थाहरूलाई कोषले भोजन, पानी, चिया वितरण गर्दा प्लास्टिकका कप प्रयोग नगर्न अनुरोध गरेको छ ।
मास्क र सेनिटाइजरको प्रयोग अनिवार्य
कोरोना भाइरस संक्रमणको खतरा कायमै रहेको स्वास्थ्यका मापदण्ड पालनालाई अनिवार्य गरिएको कोषका कार्यकारी निर्देशक डा. घनश्याम खतिवडाले बताए । ‘मापदण्डलाई पालना गरेर सम्भव भएसम्म भौतिक दूरी कायम गर्दै, मास्क र स्यानिटाइजरको प्रयोग अनिवार्य गर्नुपर्ने व्यवस्था मिलाएका छौं,’ उनले भने ।
शिवरात्रिको भोलिपल्टबाट पशुपति मेला
महाशिवरात्रिको भोलिपल्टदेखि वनकाली क्षेत्रमा एक हप्ते मेला बजार सञ्चालन गरिने गरी कोषले अनुमति दिइसकेको छ । यो मेला हरेकवर्ष शिवरात्रीको भोलिपल्टबाट लाग्दै आएको छ । यद्यपि, गतवर्ष भने कोरोना महामारीका कारण मेला लाग्न सकेको थिएन । यसपाली भने मेलाबजार सञ्चालनका लागि अनुमति दिइसकिएको खतिवडाले जानकारी दिए
भिडियो :
फोटो/भिडियो : राजकुमार श्रेष्ठ/मेरो लाइफस्टाइल
यो पनि…
महाशिवरात्रिको तयारी पूरा, सवारीसाधनको रुट फेरियो
पशुपतिमा दुई वर्षपछि महाशिवरात्रि मेला
