यस्ता गल्तीले समयपूर्व जन्मिन सक्छ बच्चा

गर्भावस्थामा महिलाले आफ्नो स्वास्थ्यको अरू बेलाभन्दा धेरै ख्याल राख्छन् । जसले गर्दा आफ्नो स्वास्थ्यसँगै बच्चा पनि सुरक्षित रहोस् र प्रसवमा कुनै समस्या नहोस् । तर केही अवस्थामा भने समयपूर्व पनि बच्चा जन्मिन्छन् ।

उमेर र पाठेघरको असक्षमता जस्ता धेरै कारकहरूले पनि यसको पछाडि ठूलो भूमिका खेल्छ । गर्भवती महिलाहरूले केही कुराहरूमा ध्यान दिँदा समयपूर्व बच्चा जन्मिने सम्भावनालाई कम गर्न सकिन्छ । गर्भावस्थाको बेला ध्यान दिनुपर्ने कुराहरू यस प्रकार छन् :

खुट्टाको मालिस
गर्भावस्थामा खुट्टाको मालिसले धेरै आराम मिल्छ । यो समयमा महिलाहरूलाई खुट्टामा मसाज गर्न विशेषज्ञहरू सल्लाह पनि दिन्छन् । तर गर्भावस्थाको समयमा जथाभावी खुट्टाको मालिस गर्नु हुँदैन किनभने यसले पाठेघरलाई सङ्कुचित गर्न सक्छ ।
खुट्टा, टाउको र हातमा अकुप्रेसर विन्दुहरू हुन्छन् जुन धेरै हदसम्म प्रजनन प्रणालीसँग सम्बन्धित हुन्छन् । खुट्टाको मसाज गर्दा तिनीहरूमा दबाबले समयभन्दा पहिले बच्चा जन्मन सक्छन् । कतिपय अवस्थामा गर्भपतन हुने सम्भावना पनि हुन्छ।

मुखको स्वच्छतामा ध्यान नदिनु
सुन्दा, तपाईंलाई अनौठो लाग्न सक्छ, मुखको स्वच्छता समयपूर्व डेलिभरीसँग सम्बन्धित छ । यदि, गर्भवती महिलाले आफ्नो मौखिक स्वास्थ्य स्वच्छता कायम नराखेको खण्डमा, शरीरले केही हर्मोनहरू निस्कासन गर्छ । जसले मुखको संङ्क्रमणको साथसाथै समयभन्दा पहिले डेलिभरी निम्त्याउन सक्छ ।

यसले मुखको सङ्क्रमण जस्तैः दाँत किराले खाने, सुन्निने, गिजाबाट रगत बग्ने, मुखमा अल्सर वा दाँतको दुखाइले समयअघि नै डेलिभरीको जोखिम बढाउन सक्छ । त्यसैले, यस्तो अवस्थामा मुखको स्वच्छतामा विशेष ध्यान दिनुपर्छ ।

भारी व्यायाम
गर्भावस्थाको समयमा, महिलाहरूलाई विशेषज्ञद्वारा निर्धारित व्यायाम गर्न सल्लाह दिइन्छ । यसले गर्दा शरीर तन्दुरुस्त रहन्छ र महिलालाई पनि आराम महसुस हुन्छ । यसका साथै गर्भावस्थामा हुने मधुमेहको जोखिम पनि कम हुन्छ । तर गर्भको अवस्थामा भारी व्यायाम गर्नु जोखिम हुन सक्छ । यो समयमा कुनै पनि कडा व्यायाम गर्ने प्रयास गर्नाले पेटमा दबाब ल्याउन सक्छ, समय पूर्व डेलिभरीको सम्भावना बढ्छ । साथै कहिलेकाहीँ बच्चा पनि यसबाट प्रभावित हुन सक्छ ।

लामो यात्रा
गर्भावस्थामा लामो यात्रा गर्नु पनि खतराको सूचक हुन सक्छ । गर्भवती महिलाले शुरुको ३ महिना र अन्तिम ३ महिनामा लामो दूरीको यात्रा गर्नु हुँदैन । यसले गर्भपतन हुने तथा समयपूर्व बच्चा जन्मने सम्भावना हुन्छ । यस्तो अवस्थामा युरिन इन्फेक्सन भएको खण्डमा पनि समय पूर्व बच्चा जन्मने सम्भावना हुन्छ । त्यसैले, लामो यात्रा नगर्नुको साथै युरिन इन्फेक्सन हुन नदिन प्रशस्त मात्रामा पानी पिउनुपर्छ ।

स्तनको उत्तेजना
गर्भावस्थाको समयमा महिलाको शरीरमा धेरै परिवर्तनहरू हुन्छन् । यस समयमा महिलाहरूले निप्पल चिलाउने वा हल्का दबाब महसुस हुने हुन सक्छ । निप्पल चिलाउँदा शरीरले अक्सिटोसिन नामक हर्मोन उत्सर्जन गर्छ जसले समयभन्दा अघि नै डेलिभरी गराउन सक्छ । त्यसैले गर्भावस्थाका महिलाले निप्पलमा दबाब पर्ने काम गर्नु हुँदैन ।

यो पनि
हिउँदमा केटु : टोली क्याम्प फोर प्रस्थान गर्दै