महामारीमा खुम्चिएको होली बजार

होलीको रौनक यस वर्ष पनि रङहीन बनेको छ । गत वर्ष कोरोना महामारीले उभो लाग्न नसकेको होली व्यापार यो वर्ष पनि कोरोनाले खुम्चिन पुगेको छ । रङ, अबिर, पिचकरी, लोला, बेलुन र होली विशेष टि–सर्ट लगायत सामान वर्षमा एक पटक हुने व्यापार हो । तर गत वर्षको पुराना स्टक समान बेच्न पनि समस्या रहेको बताउँछन् व्यापारीहरू ।

रङ र अबिरको बजार

रङको पर्व होलीमा नै रङको व्यापार नभएको बांगेमुढाका व्यापारी आशिष श्रेष्ठ बताउँछन् । दुई वर्षमा रङको खपत २० प्रतिशतभन्दा बढी हुन नसकेको सुनाउँछन् श्रेष्ठ । उनका अनुसार होलीमा रातो, पहेँलो, नीलो, हरियो, सुन्तला, पर्पल रङ बढी बिक्री हुने गर्दछ । होलीको लागि दशजनाले रङ किनेमा त्यसमध्ये २ जना दल्ने र ८ जनाले छर्ने रङ (अबिर) लैजाने गरेको उनी बताउँछन् ।

होली टि–सर्टको बजार

होलीको अवसरमा उत्पादन गरिएको सेतो रङको टि–सर्टमा होलीको विभिन्न शुभकामना लेखिएको हुन्छ । होलीको समयमा यो टि–सर्ट एकदमै लोकप्रिय हुन्छन् । तर महामारीले गर्दा यसको व्यापार खुम्चिएको बताउँछिन् असनकी व्यापारी कमला खनाल । निराश मुद्रामा उनी भन्छिन्, ‘गत वर्षको होलीको टि–सर्ट २ सय थान त्यत्तिकै फालियो । ५ सय थान स्टकमै छ । यो वर्ष जान्छ कि सोचेको तर कटेको छैन ।’
समग्रमा कोरोनाको महामारीमा खुम्चिएको छ व्यापार । त्यसैले, एक वर्ष बितिसक्दा पनि होली बजार आशालाग्दो छैन । ‘पहिला–पहिला होली आउनु एक महिना अगाडीदेखि बस्ने फुर्सद हुँदैन थियो । आफूलगायत पाँच जना कामदार थप्नुपर्ने स्थिति थियो । तर कोरोनापछि कुनै व्यापार छैन, घाटा मात्रै छ,’व्यापारी खनाल भन्छिन् ।

पिचकारीको बजार

होलीमा जुन किसिमको रौनक र उल्लास हुनुपर्ने हो, बजारमा त्यो किसिमको नरहेको बताउँछन् अर्का व्यापारी प्रदिप अग्रवाल । उनका अनुसार होलीमा पिचकारी २५ देखि ३० प्रतिशत विक्री भएको छ ।

होलीको लागि यो वर्ष २ लाखको समान ल्याएको बताउँदै व्यापारी अग्रवाल भन्छन्, ‘होलीमा व्यापार राम्रो होला साेचेको । तर, स्वास्थ मन्त्रालयले भीडभाड, सभा, समारोह, गोष्ठी लगायतका कार्य गर्न नदिने भएपछि व्यापार हुने सम्भावना छैन ।’

वर्षमा एक पटक हुने होलीको व्यापारको समान विक्री नभएपछि वर्ष दिन स्टक राख्नुपर्ने र त्यो समान बिग्रिने उनी बताउँछन् ।

मदिराको बजार

होलीको समयमा मदिराको बजार पनि निकै फस्टाउँछ । यो मौकामा विभिन्न कम्पनीहरुले आफ्नो ब्राण्डको प्रचार प्रसारका लागि टि–सर्टलगायत चिज वितरण गर्दछन् । तर यो वर्षको होली सामाजिक सञ्जालमा नै सीमित देखिन्छ । यो वर्ष होलीको माहोल नरहेको बताउँछन् मदिराका थोक व्यापारी राजन केसी । अरु वर्षको जस्तो चहलपहल नरहेको तर होलीकै दिन भने यसको विक्री हुनेमा उनी आशारत छन् ।

मिठाईको बजार

होलीको अवसरमा बढी विक्री हुने परिकारमध्ये मिठाई पनि एक हो । होलीमा लालमोहन, बुलि वर्फि, रसभरी मिठाईको बढी विक्री हुने बताउँछन्, आँगन मिठाईका बजार प्रवन्धक रामस्वरुप । तर लकडाउनले मिठाई बजार पनि चौपट गरेको छ । उनका अनुसार लकडाउन अगाडी उनको पसलमा ४० परिकारको मिठाई बन्थ्यो तर अहिले घटेर ९ परिकार मात्र छ ।

९० प्रतिशत मिठाईको व्यापार घटेको बताउँदै उनी भन्छन्, ‘मान्छे पहिले पेट भर्छ, त्यसपछि रमाइलो सोच्छ । होलीमा मिठाई परिकार रमाइलोको रूपमा लिइन्छ, त्यसैले पनि बिक्री भएको छैन ।’ समग्रमा गत वर्षझैं यस वर्ष पनि सर्वसाधारणदेखि व्यापारी सम्मको रंगको पर्व होली रंगहीन बनेको छ ।