एउटै हेल्मेटको मूल्य डेढ लाख
हेल्मेटमा सम्झौता नगराैं
मोटरसाइकल किन्दा बढी माइलेज दिने, धेरै सुरक्षा फिचर भएको, आकर्षक, आरामदायी लगायतका विविध सेवा सुविधा र विशेषता भएको नै छनोट गर्ने चलन छ । यी सबैजसो विशेषता भएका मोटरसाइकलको मोल जति नै भए पनि ग्राहकले सोही अनुसारको बजेट तयार पारेका हुन्छन् ।
तर हेल्मेट छनौटमा मोटरसाइकल चालकको ध्यान खासै पुगेको देखिदैन । मोटरसाइकल किनेसंगै उपहारमा पाएको हेल्मेटले नै काम चलाएको देखिन्छ । जबकि सोरुमहरूले उपहारका लागि ल्याएका हेल्मेट सस्तो खालकै हुन्छन् । त्यसो त ग्राहकले अघि पछि पनि हेर्दा आकर्षक देखिने सस्ता हेल्मेट नै खरिद गर्छन् ।
यसरी छनोट गरिएको सस्तो हेल्मेटले दुर्घटना भएमा ठक्करको प्रभाव आफूमा लिन सक्दैन । यस्तोमा चालक सधैं असुरक्षित रहन्छ । त्यसैले, हेल्मेटको बिल्ड क्वालिटी, सुरक्षा मापदण्ड, फिचरहरू, आरामदायी क्षमतालगायत विभिन्न पाटाहरू केलाएर मात्र छनोट गर्नुपर्ने हेल्मेट्स नेपालका मार्केटिङ म्यानेजर श्रीकेश शाक्य बताउँछन् ।
मध्यम वर्गदेखि उच्च वर्गका लागि लक्षित गरी नेपाली बजारमा हाल ५ सय देखि डेढ लाख रुपैयाँ सम्मका हेल्मेट उपलब्ध छन् ।
‘राम्रो हेल्मेट महङ्गै हुन्छ’
नेपाली बजारमा विभिन्न विदेशी ब्रान्डका हेल्मेटहरू उपलब्ध छन् । चालकको सुरक्षाको लागि लगाइने हेल्मेट पनि ब्रान्ड नै पिच्छे फरक फरक किसिमका छन् । तिनको प्रकार, विशेषता र मूल्य पनि फरक हुन्छ ।
यद्यपी सुरक्षा मापदण्ड अपनाएर बनाइएको र विभिन्न परीक्षण पास गरेको सर्टिफाइड, विशेष फिचरयुक्त, आरामदाई र सुरक्षित गुण भएका हेल्मेटहरू करिब ८ हजारभन्दा माथि पर्ने शाक्य बताउँछन् । ‘बजारमा उपलब्ध हेल्मेट आकर्षक देखिए पनि सस्तो मूल्यमै पनि उपलब्ध हुन्छन् । ती हेल्मेटको सुरक्षित गुण र सर्टिफिकेसनको ग्यारेन्टी लिन सकिदैन,’ उनी भन्छन्, ‘गुणस्तरीय र सर्टिफाइड हेल्मेट भने केही महङ्गो तर भरपर्दाे र जेन्युन हुन्छ ।’
ग्राहकहरूले हेल्मेट खरिद गर्दा आधिकारिक विक्रेताबाट हेल्मेटको पछिल्लो भागमा प्रिन्ट गरिएको सुरक्षा सर्टिफिकेसनको लोगो भएको हेल्मेट नै किन्नुपर्छ ।
कति महङ्गा हेल्मेट छन् बजारमा ?
मध्यम वर्गदेखि उच्च वर्गका लागि लक्षित गरी नेपाली बजारमा हाल ५ सय देखि डेढ लाख रुपैयाँ सम्मका हेल्मेट उपलब्ध छन् । केही महंगो तर गुणस्तरीय हेल्मेटहरू यस प्रकार छन् ।
एजिभी पिस्टा जिपीआर कार्बन विन्टर टेस्ट २०१८
ईटालियन मोटरसाइकल हेल्मेट कम्पनी एजीभीको एजिभी पिस्टा जिपीआर कार्बन विन्टर टेस्ट २०१८ हेल्मेटमा शतप्रतिशत कार्बन फाइबर सेलको प्रयोग भएको हुन्छ । विभिन्न सुरक्षा मापदण्ड अपनाएर उत्पादन गरिएको यस हेल्मेटको नेपाली मोल करिब एउटा सामान्य मोटरसाइकल बराबर छ । यसको मोल १ लाख ३५ हजार रुपैयाँ तोकिएको छ ।
यो हेल्मेट विश्वबजारमै डिओटी सर्टिफाइड हेल्मेट हो । यो हेल्मेट मुख्यतः मोटरसाइकल रेसका लागि डिजाइन गरिएको हो । यसमा कुशल एरोडाइनामिक्स, एकीकृत भेन्टिलेसन प्रणाली, तीब्र गतिको समयमा स्थिरता प्रदान गर्ने प्रणालीजस्ता प्रविधि जडान गरिएको छ ।
हेल्मेट भित्रको प्याडिङ पनि चालकको टाउकोलाई उच्च आराम प्रदान गर्ने किसिमले निर्माण गरिएको हुन्छ । प्याडिङको सबै भागहरू निकालेर धुन मिल्ने किसिमले डिजाइन गरिएको छ । एन्टिब्याक्टेरियल प्रोटेक्सन र छालालाई प्रिमियम कम्फर्ट प्रदान गर्ने किसिमको प्याडिङको व्यवस्था यसमा छ ।
लामो यात्रा वा रेसिङको समयमा चालकले पानी पिउन मिल्ने किसिमको ट्युब, छिटो खुल्ने र लक हुने प्रणाली, स्क्रयाच नहुने पिनलक भाइजर रहेको छ । कुनै दुर्घटना भएमा अनुहार र आँखालाई जोगाउन ५ एमएमको भाइजर रहेको छ ।
एजिभी के ६
ईटालियन मोटरसाइकल हेल्मेट कम्पनी एजिभीकै एजिभी के ६ नार्डो ग्रे पनि कार्बनफाइबर सेलले बनेको हेल्मेट हो । यो हेल्मेटको नेपाली बजार मुल्य ५५ हजार रुपैयाँ तोकिएको छ ।
यो डिओटी सर्टिफाइट हेल्मेटमा शतप्रतिशत पिनलक (१२०) भाइजर, ८५ डिग्री भर्टिकल भ्यु, मेटल भाइजर मेकानिजम, माइक्रो ओपनिङ सिस्टम, मल्टिस्टेप भाइजर प्रणाली, छिटो खुल्ने र लक हुने प्रणाली भएको स्क्रयाच नहुने भाइजर रहेको छ । यस हेल्मेटमा पनि एन्टिब्याक्टेरियल प्रोटेक्सन सहितको निकालेर धुन मिल्ने प्याडिङको व्यवस्था रहेको छ छ ।
सार्क स्पार्टन लोरेन्जो
१९८६ मा स्थापना भएको फ्रान्सेली हेल्मेट कम्पनी सार्कको विश्वभर करीब ५ हजार बिक्रि आउटलेट रहेका छन् । नेपालमा पनि सार्कका विभिन्न हल्मेट उपलब्ध छन्, जसमध्ये सार्क स्पार्टन लोरेन्जो पनि एक हो । यस डिओटी सर्टिफाइड हेल्मेटको मुल्य ५२ हजार रुपैयाँ तोकिएको छ ।
यस हेल्मेटमा पिनलक भाइजर, एकीकृत इन्टर्नल भाइजर, वायरलेस सिस्टम, तीब्र गतिमा रहँदा हेल्मेटभित्र आउने आवाज कम गर्ने प्रणालीजस्ता विशेषता रहेका छन् । साथै कम्पनीले यस हेल्मेटमा ५ वर्षको वारेन्टी पनि दिएको छ ।
बेल क्वालिफायर
अमेरिकी कम्पनी बेल स्पोर्टसले उत्पादन गरेको बेल हेल्मेट इसिई सर्टिफाइड हेल्मेट हो । पोलिकाब्रोनेट सेलले बनेको यो हेल्मेट एरोडाइनामिक र निकै आकर्षक छ । यो हेल्मेटको मुल्य १८ हजार ५ सय रुपैयाँ तोकिएको छ ।
यो हेल्मेटमा समायोज्य भेन्टिलेसन प्रणाली, हेल्मेटभित्र आउने आवाज कम गर्ने प्रणाली, स्पीकर पकेट, युभी प्रोटेक्टेड भाइजर लगायतका फिचर रहेका छन् । यो मोडलको हेल्मेटमा पनि ५ वर्षको वारेन्टी रहेको छ ।
एसएमके टाइटान
युरोपियन ब्रान्ड एसएमके टाइटान नेपाली बजारमा एकदमै लोकप्रिय हेल्मेट मध्येको एक हो । यस हेल्मेटमा युवावर्गलाई लक्षित फिचर जडान गरिएको छ । यो हेल्मेटको मोल नेपालमा १७ हजार ५ सय रुपैयाँ तोकिएको छ ।
फाइबर ग्लासले बनेको यो हेल्मेट इसिई सर्टिफाइड हेल्मेट हो । स्क्रयाच नहुने पिनलक भाइजर समावेश गरिएको यो हेल्मेटमा ब्लुटुथ, निकालेर धुन मिल्ने प्याडिङ, राम्रो भेन्टिलेसन जस्ता विविध फिचर रहेका छन् ।
एक्सोर एपेक्स हन्टर
भेगा कम्पनीले उत्पादन गर्ने फिचर लोडेड हेल्मेट एक्सोर एपेक्स हन्टर एक भ्यालु फर मनी हेल्मेट हो । यो हेल्मेटमा पनि युवावर्ग लक्षित फिचर समावेश गरिएको छ । यसको मुल्य नेपाली बजारमा १० हजार ९ सय रुपैयाँ रहेको छ ।
पोलिकाब्रोेनेटले बनेको यो हेल्मेट इसिई सर्टिफाइड छ । साथै, यस हेल्मेटमा डबल डि रिङ्ग पट्टा, पिनलक भाइजर, इन्टर्नल भाइजर, टुथलेस भाइजर चेन्ज मेकानिज्म, ब्रेथ गार्ड र राम्रो भेन्टिलेसन जस्ता फिचर सामवेश छ ।
