सेवामा खोप कार्ड अनिवार्य, २५ जनाभन्दा बढी भेला नहुन गृहको निर्देशन
कोरोना भाइरसको संक्रमण तीव्र गतिमा बढिरहँदा गृह मन्त्रालयले सार्वजनिक स्थलमा २५ जनाभन्दा बढी व्यक्ति भेला हुन नपाउने निर्णय गरेको छ । निर्णय कार्यान्वयका लागि गृह मन्त्रालयले प्रहरी प्रधान कार्यालय, सशस्त्र प्रहरी प्रधान कार्यालय, सबै जिल्ला प्रशासन कार्यालय र मातहतका विभाग तथा निकायहरुलाई पत्राचार गरेको छ ।
कोभिड–१९ संकट व्यवस्थापन समन्वय केन्द्र (सीसीएमसी)ले आइतबार गरेका सिफारिसहरु कार्यान्वयन गर्न गृहले निर्देशन दिएको हो ।
गृह मन्त्रालयले सार्वजनिक स्थलमा सबै प्रकारका राजनीतिक, तथा धेरै जना उपस्थित हुने गरी प्रशासनिक, सामाजिक एवम् त्यही प्रकृतिको कार्यक्रम नगर्न भनेको छ । गृहले सार्वजनिक स्थलहरुमा २५ जनाभन्दा बढि भेला हुने गरी मेला, भेला तथा महोत्सवहरु आयोजना नगर्न नगराउन आवश्यक व्यवस्था गर्न निर्देशन दिएको छ ।
सार्वजनिक स्थानहरु कार्यालय, होटल, रेस्टुरेन्ट, सिनेमा हल, रंगशाला, हवाईयात्रा, पार्क आदिमा प्रवेश गर्दा अनिवार्य रुपमा कोभिड विरुद्धको खोप लगाएको कार्ड साथमा राख्ने र ती निकायहरुले खोप कार्ड हेरेर मात्र प्रवेश दिने व्यवस्था मिलाउन निर्देशन जारी गरेको छ । मन्त्रालयले माघ ७ गतेदेखि उक्त व्यवस्था लागू गर्न भनिएको छ ।
त्यसैगरी, नेपाल प्रवेश बिन्दुमा एन्टिजेन परीक्षणलाई थप प्रभावकारी बनाउने र संक्रमितलाई तत्काल आइसोलेसनमा राख्न सम्बन्धित जिल्लाका कोभिड–१९ संकट व्यवस्थपान केन्द्र (डिसीसीएमसी)लाई समेत निर्देशन दिएको छ ।
साथै, सार्वजनिक स्थानमा निःशुल्क ऐन्टिजेन टेस्ट बुथहरु स्थापना गर्न र खोपलाई निरन्तरता दिन आवश्यक सहजिकरण गर्न समेत भनिएको छ ।
यस्तो छ मन्त्रालयको निर्णय:
यो पनि
नेपालमा कोरोना संक्रमितको ग्राफ उकालो लाग्दै, एकैदिन थपिए १४४६ संक्रमित
