सार्वजनिक सवारी साधनमा २८ प्रतिशतसम्म भाडा वृद्धि

यातायात व्यवस्था विभागले अन्तरप्रदेश चल्ने सार्वजनिक सवारी साधनको भाडा २८ प्रतिशतसम्म वृद्धि गरेको छ । दुई वा दुईभन्दा बढी प्रदेशमा चल्ने लामो दूरीको सवारी साधनमा भाडा बढाइएको विभागका प्रवक्ता डा. लोकनाथ भुसालले बताए ।

यात्रुबाहक सवारी साधनको भाडा २८ प्रतिशत, तराईमा चल्ने सवारी साधनमा २० प्रतिशत र पहाडमा चल्ने मालबाहक सवारी साधनमा २६ प्रतिशत भाडा बढाइएको हो । पेट्रोलियम पदार्थको मूल्य वृद्धि, चालक, सहचालकको खर्च र सवारी साधनमा हुने मर्मतलगायत अरु किसिमका खर्चका आधारमा भाडा बढाइएको प्रवक्ता डा. भुसालले जानकारी दिए । ‘वि.सं २०७२ यता भाडादर बढाइएको थिएन,’ उनले भने , ‘सवारी साधनमा सबै कुरामा मूल्यवृद्धि भइरहेकै आधारमा भाडा बढाइएको हो ।’

असार २७ गते मा नेपाल सरकार भौतिक पूर्वाधार तथा यातायात मन्त्रालयको मन्त्री स्तरको भइ नेपालको संविधान २०७२ को अनुसुची ५ को बुँदा नं २० र अनुसुची ९ को बुँदा नं १५ का आधारमा नेपाल सरकारले गरेको कार्य विस्तृतिकरण र सवारी तथा यातायात व्यवस्था ऐन २०४९ को दफा ९६ को उपदफा १ बमोजिम सोहि ऐनको दफा १५३ को खण्ड ३ ले दिएको अधिकार प्रयोग गरि भाडा बढाइएको डा. भुसालले जानकारी दिए ।