लोकगायक रत्न बेहोसीलाई नेपालरत्न सम्मान

भदौ १३ गते । केके मानन्धर ।
लोकगायक रत्न (बेहोसी) बज्राचार्यलाई नेपालरत्न सम्मान प्रदान गरिएको छ । नेवाः साधना कला केन्द्रले बेहोसीलाई उहाँको ९० औं जन्मदिनको अवसरमा सम्मान गरेको हो । नेपाली र नेपालभाषाको गीतसंगीतमा उहाँको योगदानलाई उच्च मूल्याङ्कन गर्दै नेपालरत्न सम्मान दिइएको आयोजक संस्थाका पौभाः साय्मिले बताउनुभयो । ललितपुरको ज्यापु प्रज्ञा भवनमा सम्पन्न भएको नेपालरत्न सम्मान तथा रत्न बेहोसी एकल साँझ कार्यक्रममा उहाँलाई सम्मान गरेको हो । यसअघि बेहोसीलाई ललितरत्न सम्मान र गणेशदेवी स्मृति पुरस्कार दिइएको थियो । उहाँले १२ वर्षको उमेरदेखि नाटक र संगीतको विधामा आफ्नो कला प्रस्तुत गर्नुभएको छ। विक्रम संवत् २०१० सालदेखि नेपाली र नेपालभाषाको गीतसंगीतको श्रीवृद्धि, विकास तथा समृद्धिको क्षेत्रमा बेहोसीले योगदान दिंदैआउनु भएको छ । उहाँले पहिलो पटक २०१३ सालमा रेडियो नेपालमा स्वर परीक्षण गराउनु भएको थियो।

१७ जना उम्मेदवारमध्ये उहाँ एकल गायकको रुपमा रेडियो नेपालमा स्वर परीक्षणमा उत्तीर्ण हुनुभएको थियो । सोही दिन रेडियो नेपालमा प्रत्यक्ष प्रसारण मार्फत उहाँको गीत प्रशारण भएको थियो । त्यो बखत रेडियो नेपालबाट स्वर परीक्षण उत्तीर्ण गरेर प्रत्यक्ष प्रशारण मार्फत गीत गाउने नेपालकै थोरै मात्र गायक हुनुहुन्छ ।
उहाँको समकक्षीको रुपमा स्वर सम्राट नारायणगोपाल गुरुवाचार्य, गोल्डेन भ्वइस अफ नेपाल प्रेमध्वज प्रधान, गायक तथा वरिष्ठ संगीतकार नातीकाजी श्रेष्ठ, शिवशंकर मानन्धर, भक्तराज आचार्यहरु हुनुहुन्थ्यो । नेपाली आधुनिक गीतसंगीतका उहाँहरु दोस्रो पुस्ता हुन् । त्यसअघि मास्टर रत्नदास प्रकाश, हरिकृष्ण श्रेष्ठ, बच्चु कैलाश लगायतका संगीत साधकहरु पहिलो पुस्ताका गायक हुन् । बेहोसीले नेपालभाषामा ५० र नेपाली भाषामा कम्तिमा १० वटा गीत गाइसकेका छन् । उहाँले गाएका र रचना गरेका दर्जनभन्दा बढी गीतहरू अझै पनि क्यासेटमा सुरक्षित छ ।