गुड नाइट वार्ता–२
सपनामा प्रायः बुबाआमालाई देख्छु
चर्चित हास्यकलाकार हुन्– किरण केसी । ‘जिरे खुर्सानी’ बाट थप चर्चामा आएका केसी ‘राता मकै’ उपनामले चर्चामा छन् । सयौं टेलिशृङ्खला र दर्जनौं चलचित्रमा अभिनय गरिसकेका केसी मेरो लाइफस्टाइलको नियमित स्तम्भ ‘गुड नाइट वार्ता’ मा यसरी प्रस्तुत भएः
बेलुकाको खाना कति बजे खानुहुन्छ ?
ढिलोमा ८ः३० बजेभित्र खाइसक्छु ।
बेलुका के खानुुहुन्छ ?
४/५ वर्ष अघिसम्म दाल, भात, तरकारी, मासु सबै खान्थे । तर, हिजोआज रोटी, दाल र अण्डा खान्छु ।
कति बजे सुत्नु हुन्छ ?
१०ः३० बजेभित्र सुतिसक्छु । गुड नाइट भनेको ५ मिनेटमा निदाउँछु ।
बेडमा जानुअघि के गर्नुहुन्छ ?
श्रीमतीसँग रमाइलो कुराकानी गर्छु । तर, त्यो कुराकानी यहाँ भन्न मिल्दैन ।
सिरानी कता पार्नुुहुन्छ ?
दक्षिणतिर सिरानी छ ।
कता सुत्नुुहुन्छ ?
भित्तातिर सुत्छु ।
के लगाएर सुत्नुहुन्छ ?
गन्जी र कट्टुमात्र लगाउँछु ।
बेलुका रक्सी खाने बानी छ कि छैन ?
छैन ।
सुत्नुअघि अन्तिम पटक के खानुहुन्छ ?
काजु, दुध र बेसार खान्छु ।
सुत्नुअघि नियमित गर्ने काम के हो ?
ट्वाइलेट गएर पिसाब फेर्ने अनि दिउँसो लगाएको कपडा खोल्ने ।
सपना देख्नु कि देख्नुहुन्न ?
धेरै देख्छु । प्रायः आमाबुबालाई सपनामा देख्छु ।
निद्रा लागेन भने के गर्नुहुन्छ ?
निद्रा नलागे घोप्टो पर्छु । निदाउने प्रयास गर्छु ।
राती अकस्मात निद्रा खुलेमा के गर्नुहुन्छ ?
मनमा कुरा खेलाउँछु ।
राती उठ्ने बानी छ कि छैन ?
एकपटक पिसाब गर्न उठ्छु ।
