पशुपतिकै वृद्धाश्रम असुरक्षित, सम्बन्धित निकायलाई छैन चासो (भिडियो पनि)

आराध्यदेव पशुपतिनाथ मन्दिरकोे दक्षिणतर्फ एउटा वृद्धाश्रम छ । जसलाई पशुपति वृद्धाश्रम नामले चिनिन्छ । जहाँ बस्छन्, ९९ जना वृद्धवृद्धा । तर, सधैँ त्रासमा । भवन कतिबेला ढल्छ टुङ्गो छैन । त्यसो त उनीहरू दिनरात डरमै बिताइरहेका छन्, यद्यपि, सम्बन्धित निकाय भने मौन छ ।

विसं १९३८ मा पञ्चदेवलको रूपमा निर्मित यो भवन २०३४ देखि वृद्धाश्रमको नाममा सञ्चालनमा आएको हो । २०७२ को महाभूकम्पले जीर्ण यो भवनको अझै पुनर्निर्माण हुन सकेको छैन ।

वृद्धाश्रम जीर्ण बनेको भन्दै संसदको विकास तथा प्रविधि समितिले नयाँ ठाउँमा सार्न तीन वर्षअघि नै सरकारलाई निर्देशन दिएको थियो । तैपनि, सारिएको छैन नत यहाँका संरचनाको पुनर्निर्माण नै गरिएका छन् ।

अहिले आश्रममा वृद्धवृद्धाको संख्या धेरै कम छ, २ सय ३० जनाको क्षमता भएको भए पनि ९९ जना मात्र हुनुहुन्छ सँगै रहेको अर्को जीर्ण भवन कतिबेला ढल्छ टुंगो छैन ।

भूकम्पले क्षतिग्रस्त भएको संरचनाहरू पुनर्निर्माण गरिदिन भन्दै वृद्धाआश्रमले पशुपति क्षेत्र विकास कोषलाई नगुहारेको पनि होइन । तर, कोषले ती वृद्धवृद्धाको गुहारलाई सुनेन, वा सुन्ने प्रयत्न गरेन ।

‘पत्राचार गरेको एक वर्ष बित्न लागिसक्दा पनि कोषबाट कुनै जवाफ आएको छैन,’ पशुपति वृद्धाश्रमका कार्यालय प्रमुख ओमप्रसाद पाण्डे भन्छन्, ‘अहिले आश्रममा वृद्धवृद्धाको संख्या धेरै कम छ, २ सय ३० जनाको क्षमता भएको भए पनि ९९ जना मात्र हुनुहुन्छ सँगै रहेको अर्को जीर्ण भवन कतिबेला ढल्छ टुंगो छैन ।’

पञ्चदेवल जीर्ण भएका कारण वृद्धवृद्धालाई त्यस क्षेत्रमा जान रोक लगाएको र क्षतिग्रस्त भवनबाट कार्यालय र वृद्धवृद्धालाई अस्थायी भवनमा राखिएको पाण्डे बताउँछन् । ‘भवन क्षतिग्रस्त भएकोले जस्तापाताले बारेर कार्यालय र अस्थायी टहरा बनाएर बसेको ६ वर्ष बित्यो,’ उनले भने, ‘अहिले वृद्धवृद्धा बसेको भवनमा पनि भूकम्पले क्षति पुर्याएको छ भने सँगैको भवन पूर्ण जीर्ण छ त्यसलाई न पन्छाइएको छ न पुननिर्माण सुरू गरिएको छ ।’ त्यसैले, वृद्धवृद्धाहरू त्रासमा बाँचिरहेको पाण्डे सुनाउँछन् ।

पुनर्निर्माणको काम भइरहेको छ, तर समाप्त भइसकेको छैन । पशुपति परिसरले ठूलो क्षेत्र ओगटेकाले पुनर्निर्माणको कार्यमा समय लागेको हो ।

यता कोष भने पशुपति परिसरमा पुनर्निर्माणको काम भइरहेको बताउँछ । पशुपति क्षेत्र विकास कोषका प्रवक्ता रेवतीरमण अधिकारी भन्छन्, ‘पुनर्निर्माणको काम भइरहेको छ, तर समाप्त भइसकेको छैन । पशुपति परिसरले ठूलो क्षेत्र ओगटेकाले पुनर्निर्माणको कार्यमा समय लागेको हो ।’

राष्ट्रिय पुनर्निर्माण प्राधिकरणले पुनर्निर्माणको काम लगभग सकिएको भन्दै बाँकी काम सक्न सहरी विकास मन्त्रालयलाई हस्तान्तरण गरेको थियो ।

काठमाडौं उपत्यकाका विश्व सम्पदा सूचीमा परेका सम्पदाहरूको पुनर्निर्माणको काम लगभग सकिएको हुनाले बाँकी काम सम्बन्धित निकायलाई सुम्पिएको प्राधिकरणका पूर्व प्रवक्ता भगवान अर्याल बताउँछन् ।

यद्यपि, पशुपति वृद्धाश्रममा भने कसैको पनि ध्यान पुग्न सकेको छैन ।

भिडियो :

फोटो/भिडियो : किरण स्याङ्बो/ मेरो लाइफस्टाइल

यो पनि…
कानुनले घटायो वृद्धाआश्रममा ज्येष्ठ नागरिक
पशुपतिनाथ योगिका योगी महायोगी