ओलम्पिकभरि कोभिडबाट बच्न चीनमा सहरभित्र अर्को सहर खडा

बेइजिङका २ करोड २० लाख मानिसहरूलाई कोभिड संक्रमणको जोखिमबाट जोगाउन चीनले सहरभित्र पनि अर्को सहर खडा गरेको छ, जहाँ बस्ने अतिथिलाई बाहिरी मानिसहरूसँग छलफल र भेटघाट गर्न छुट छैन । उनीहरूलाई इन्टनेटको पहुँचको सुविधा छ भने खानेकुरा रोबाेटले नै वितरण गर्छ ।

ओलम्पिक र प्यारालम्पिक खेलका लागि दुई महिनाको अवधिमा दशौं हजार खेलाडी र उनीहरूलाई सहयोग गर्ने व्यक्तिलाई निश्चित र सुरक्षित स्थानमा राखिएको छ । मध्य बेइजिङबाट थोरै बाहिर रहेको यानकिङ जिल्ला र बेइजिङनजिकैको हिवेई प्रान्तको झाङजिअकोउ सहरमा आगन्तुकहरूलाई राखिएको छ ।

कोभिड शून्य नीतिमा जोड दिने पहलस्वरूप चीनले ओलम्पिकलाई त्यहाँको घना जनसंख्याबाट पूर्णरूपमा अलग गरेको हो । चाँडै फैलिने ओमिक्रोन भेरियन्टका कारण कोभिड संक्रमण फैलिएसँगै सरकारले ओलम्पिक प्रतिबन्धलाई थप कडाइ गरेको छ ।

ओलम्पिकमा दर्शकहरूको भिड नियन्त्रण गर्ने योजनाअनुसार अन्तिम समय अर्थात् मध्य जनवरीमा घरेलु दर्शकहरूलाई टिकट बिक्री रोक्ने निर्णय गरिएको थियो ।

खेलका लागि समर्पित सवारी साधनहरू घेराबन्दी गरिएको निश्चित क्षेत्रमा मात्र आफ्नो लेनमा गुड्नेछन् । र, स्थानीयहरूलाई दुर्घटनाको समयमासमेत टाढै रहन सुभाव दिइएको छ ।

अन्तर्राष्ट्रिय ओलम्पिक समितिका अध्यक्ष थोमस वाचले ३ फेब्रुवरीमा आयोजित पत्रकार सम्मेलनमा भनेका थिए, ‘दुर्भाग्यवश तपाईंहरू केवल निश्चित घेराभित्र रहेका मानिसहरूसँग मात्र बोल्न सक्नुहुनेछ ।’

यो पनि
ओलम्पिक ‘ठूलो विजय’ भन्दै किमले गरे सी जिनपिङको प्रशंसा
चीनलाई नवौं पटक एसियन महिला कपको उपाधि