यी हुन् बालबालिकाको कान पाक्नुका कारण, कसरी जोगाउने ?

बालबालिकाको कान पाक्नु एक प्रमुख समस्या हो । यो सबै उमेरसमूहलाई हुन सक्छ । तर, बालबालिकाहरुमा यो बढि मात्रामा देखिन्छ । बालबालीकाको कान किन पाक्छ ? यसको लक्षण र कसरी जोगाउने भन्ने विषयमा नाक, कान, घाँटी सर्जन डा.अरुण अधिकारीले दिएको सुझाव यस्तो छ :

किन पाक्छ कान ?

बालबालिकाको भित्री घाँटीको माथिल्लो भाग र कानको मध्य भाग जोड्ने नली छोटो सिधा र फराकिलो हुन्छ परिपक्क भएको हुँदैन । जसले बेला–बेलामा त्यो बन्द भइरहन्छ । यो नलीको काम कानको प्रेसरलाई कायम राख्ने, कानमा जम्मा भएको पानीलाई बाहिर निकाल्ने हो । त्यो परिपक्व नभएको कारणले कान भित्र भएको पानी भित्र नै बस्छ र कानको प्रेसर पनि कायम हुँदैन । जसले गर्दा रुघाखोकी लाग्ने र कानको संक्रमण हुने गर्छ । जथाभावी कोट्याउने, तेल हाल्ने र कानमा पानी पस्यो भने पनि यस्ता समस्या हुन सक्छ । त्यस्तै, नवजात शिशुलाई आमाले दूध खुवाउदा स¥क्यो वा बच्चाले उल्टी गरेको दूध कानमा पस्यो भने पनि कान पाक्ने सम्भावना हुन्छ ।

लक्षण

– कानको दुखाईको कारण बच्चा रोईरहने

– ज्वरो आउने

– कान बन्द हुने

– कम सुन्निने

– कान कराउने

– पिप निस्कने

– रिँगाटा लाग्ने

जोगाउने उपाय

– बच्चाहरुको कानमा तेल नहाल्ने ।

– शिशुलाई आमाले दूध खुवाउदा सुतेर नखुवाउने ।

– बालबालिकालाई नुहाउनु अघि कानमा कपास राखिदिने ।

– बालबालिकालाई रुघाखोकी लाग्नबाट बचाउने ।

– बालबालिकाको कान जथाभावी नकोट्याउने ।

– चिकित्सकको सल्लाह बिना कानमा कुनै पनि औषधिको प्रयोग नगर्ने ।