निषेधाज्ञापछि यस्तो छ पोखराको अवस्था
कोरोनाको दोस्रो लहर बढेसँगै सरकारले मुख्य सहरमा निषेधाज्ञा गरेको छ । कास्कीमा पनि संक्रमितको संख्या बढेकाले यही १५ देखि २१ सम्म निषेधाज्ञा जारी गरिएको छ ।
जारी निषेधाज्ञाका कारणले खाद्यान्न, तरकारी, फलफूल, कुखुरा, पशुपंक्षीको दाना र औषधी ढुवानी गर्ने गाडी, दमकल, एम्बुलेन्स, शव बाहन र अत्यावश्यक मालबाहक गाडी सञ्चालनमा छन् । यी बाहेक निजी र सार्वजनिक सवारी साधनमा जोर बिजोर नियम लागू गरेको कास्कीका प्रहरी प्रवक्ता डिएसपी सुवास हमालले बताए । उनका अनुसार गतेका आधारमा सवारी साधनमा जोर र विजोर लागू छ । यसैगरी खाद्यान्न पसलहरु विहान ८ बजेदेखि साँझ ८ बजेसम्म सञ्चालन रहेको छ र अन्य पसल बन्द छ ।
कास्कीमा निषेधाज्ञाको नियम उल्लङ्घन गर्ने २ सय ३० भन्दा बढी दुई र चार पांग्रे सवारी साधन नियन्त्रणमा लिएको हमालले जनाए । यसरी नियन्त्रणमा लिएका सवारी साधनलाई दिनभरी होल्ड गरी साँझ छोडेको हो । ‘सय भन्दा बढी पसल कारवाहीमा परी बन्द गरिएको छ । नियम पालन नगरे भोलिदेखि नियम संक्रामक ऐन २०२० अनुसार कारबाही गछौँ’ उनले भने ।
पोखरा महानगरपालिका र मादी, रुपा, अन्नपूर्ण, माछापुच्छे« गरी चार वटा गाउँपालिकामा निषेधाज्ञा जारी छ । यही २१ गतेसम्म निषेधाज्ञा जारी भएपनि हप्तादिनसम्म लम्बिन सक्ने डिएसपी हमालको भनाइ छ ।
निषेधाज्ञा जारी भएपछि जनजीवनमा असर परेको व्यवसायी विन्दु गहतराज बताउँछिन् । उनी भन्छिन्, ‘स्थिती गाह्रो छ, पसलहरु सबै ठप्प छ , हस्पिटल जान र आवश्यक काम परेर बाहिर निस्किन समस्या परेको छ । ’
