सेयर बजारमा झिनो अंकको वृद्धि
साताको पहिलो कारोबार दिन आइतबार सेयर बजार २.१६ अंकले बढेको छ। आज नेप्से ०.११ प्रतिशतले बढेर १९६३.२२ बिन्दुमा पुगेर बन्द भएको हो।
नेप्से परिसूचकसँगै आज कारोबार रकम पनि बढेको छ। अघिल्लो कारोबार दिन अर्थात् बिहीबार १ अर्ब ३२ करोड २९ लाख ७२ हजार १८८ रुपैयाँ बराबरको सेयर कारोबार भएकोमा त्यो रकम बढेर आज १ अर्ब ५६ करोड १७ लाख २ हजार ९९२ रुपैयाँ पुगेको छ। आज २४३ वटा धितोपत्रको ३६ लाख ९४ हजार ८४ कित्ता सेयर किनबेच भएको छ।
आइतबार धैलागिरी लघुवित्तको सेयर मूल्यमा सकारात्मक सर्किट लागेको छ। कम्पनीको सेयर मूल्य ९.९८ प्रतिशतले वृद्धि भएसँगै सकारात्मक सर्किट लागेको हो। कम्पनीको सेयर मूल्य प्रतिकित्ता ३२१ रुपैयाँ ८० पैसामा बन्द भएको छ।
त्यस्तै, ओरियन्टल होटल्सको सेयर मूल्य ६.५७ प्रतिशतले बढेर प्रति कित्ता मूल्य ५१९ रुपैयाँ कायम भएको छ। आज सेयर मूल्य सर्वाधिक घट्नेमा नेष्डो समृद्ध लघुवित्त रहेको छ। उक्त कम्पनीको सेयर मूल्य ६.११ प्रतिशतले घटेर प्रति कित्ता मूल्य ३ हजार ३९४ रुपैयाँ झरेको छ।
त्यस्तै, नबिल बैंकको सेयर मूल्य ३.४० प्रतिशतले घटेर प्रति सेयर मूल्य ८८२ रुपैयाँमा बन्द भएको छ। आइतबार सर्वाधिक सेयर खरिद–बिक्री नबिल बैंकको भएको छ। आज कम्पनीको १९ करोड ८० लाख रुपैयाँ बराबरको सेयर खरिद–बिक्री भएको हो।
सर्वाधिक सेयर खरिद–बिक्री हुने दोस्रो सूचीमा नेष्डो समृद्ध लघुवित्तको रहेकोे छ। उक्त कम्पनीको तीन हजार ३९४ रुपैयाँमा ८ करोड ७७ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये ५ समूहको परिसूचक घटेको छ भने बाँकी ८ समूहको परिसूचक बढेको छ। आज जीवन बीमा समूहको परिसूचक सर्वाधिक १.९८ प्रतिशतले बढेको छ। त्यस्तै, होटल्स तथा पर्यटन समूहको परिसूचक १.६५ प्रतिशतले बढेको छ।
यो पनि…
गत साता घटेको सेयर बजार यो साता के होला ?
डिम्याट खाता र मेरो सेयरको वार्षिक शुल्क नबुझाए खाता रोक्का
