सैनिक कल्याणकारी कोषको सम्पत्ति ६४ अर्ब
प्रधानसेनापति प्रभुराम शर्माले सैनिक कल्याणकारी कोषको सम्पत्ति करिब रु ६४ अर्ब पुगेको खुलासा गरेका छन् ।
विसं २०३२ मा एक करोड २४ लाख एक हजार रुपैयाबाट स्थापना भएको सैनिक कल्याणकारी कोषको रकम माघ मसान्तसम्म आइपुग्दा रु ६३ अर्ब ९७ करोड २६ लाख ६० हजार पुगेको बताइएको छ ।
सुर्खेतस्थित राजदल गणमा आयोजित ‘भूतपूर्व सैनिक सम्मेलन’ उद्घाटन गर्दै प्रधानसेनापति शर्माले उक्त कुरा सार्वजनिक गरेका हुन् ।
कल्याणकारी बोर्डको समन्वयमा हिताधिकारीका लागि बैंकले लघुवित्त कार्यक्रममा हालसम्म करिब ६ अर्ब ७५ करोड रुपैयाँ कर्जा प्रवाह गरिसकेको सेनाले जनाएको छ । कल्याणकारी कोषमार्फत आफ्ना हिताधिकारीका लागि शिक्षा, स्वास्थ्य, स्वरोजगार, सीप, सहुलियतजस्ता कार्यक्रममार्फत जीवनस्तर उकास्ने कार्यक्रमलाई जोड दिँदै आएको सेनाको दावी छ ।
मुलुकको प्रमुख सुरक्षा अङ्ग नेपाली सेनामा जीवनको महत्वपूर्ण क्षण बिताएका भूपू र एकल महिलाको सङ्ख्या करिब ८५ हजार छ । नेपाली सेनाको कल्याणकारी बोर्डको संयोजनमा हुँदै आएको सम्मेलनका यस वर्षको नारा ‘भूतपूर्व सैनिक सम्मेलनको अभिलाषा : सेनाप्रतिको समर्पण र भरोसा’ भन्ने रहेको छ ।
यो पनि…
टुँडीखेलमा सेना दिवसको रौनक (फोटोफिचर)
रुस–युक्रेन युद्ध : दुवै देशका सैनिक सहचारी काठमाडौंको एउटै कार्यक्रममा
