माझी समुदायमा मनाइयो ‘लदी’ पर्व (फोटोफिचर)
अल्पसंख्यक समुदायअन्तर्गत पर्ने माझी समुदायले मंगलबार ‘लदी’ अर्थात् नदी पूजा धुमधामका साथ मनाएका छन् । सर्लाहीको बागमती नगरपालिका-१२ स्थित भरतताल प्राङ्गणमा विषेश कार्यक्रम आयोजना गरेर लदी पर्व मनाएको नेपाल माझी उत्थान संघ सर्लाहीले जनाएको छ ।
जिल्लाका विभिन्न स्थानमा वर्षौदेखि बसोवास गर्दै आएका माझीहरूले पहिलोपटक सामूहिकरूपमा लदी पूजा मनाएकाे संघका जिल्ला सह-सचिव राजकुमार कुश्वारले बताए ।
मंगलबार बिहानै बागमती नदी किनारमा पुगेर उनीहरूले नदीको पूजा गरेका थिए । त्यसपछि, दुर्गा चोकबाट निस्किएको र्याली भरत तालमा पुगेर सभामा परिणत भएको थियो । कार्यक्रममा माझी समुदायका बालबालिका, युवायुवतीदेखि वृद्धवृद्धासम्म परम्परागत पोसाकमा सजिएर आएका थिए ।
यसअघि, घरघरमै मनाउने गरिएको लदी पूजाको मौलिकता लोप हुने अवस्थामा पुगेपछि यसको संरक्षणको लागि सामूहिक कार्यक्रम आयोजना गरिएकोे पूजा समितिका कुमार माझीले बताए । आफ्नै समुदायमा समेत यसको महत्त्वबारे उजार गर्न आवश्यक रहेको उनले बताए । माझी समुदायले मुख्य पर्वको रूपमा मनाउने यस पूजाको संरक्षण आवश्यकता भएको उनीहरूको भनाइ छ ।
नदीमा डुंगा खियाउने र माछा मार्ने मुख्य पेसा मान्दै आएका माझी समुदायले नदी अर्थात् प्रकृतिको पूजा गर्दै आएको उनीहरूको दावी छ । प्रत्येक वर्ष फागुनको सांहिली अर्थात् तेस्रो मंगलबार नदीमा गएर पूजा गरे वर्षातको जस्तोसुकै भेलमा पनि डुंगा खियाउन सक्ने शक्ति मिल्ने किंवदन्ती रहेको माझी समुदायका जानकारहरूको भनाइ छ ।
रामेछाप जिल्लालाई उद्गमथलो मान्दै आएका माझी समुदाय सर्लाहीको वागमती, बरहथवाको हजरिया, हरिवनको बेताली, ईश्वरपुरको भक्तिपुर, सागरनाथ, लालबन्दीको रंजितपुर, परवानीपुर, ज्याजोर, पत्थरकोट लगायतका स्थानका बसोबास गर्दै आएका छन् । सर्लाहीमा मात्रै ६५ सय देखि सात हजारको हाराहारीमा माझीहरू रहेका नेपाल माझी उत्थान संघ सर्लाहीले जनाएको छ ।
