नेपालमा थप ३,०७५ जनामा कोरोना पुष्टि
पछिल्लो २४ घण्टामा नेपालमा तीन हजार ७५ जना कोरोना संक्रमित थपिएको छन् । स्वास्थ्य तथा जनसंख्या मन्त्रालयका अनुसार १३ हजार ३६ जनामा गरिएको पीसीआर र एन्टिजेन परीक्षणमा सो संख्यामा कोरोना पुष्टि भएको हो ।
यस्तै, गरी २४ घण्टामा दुई सय ७८ जना संक्रमण मुक्त भएका छन् भने काठमाडौं जिल्लामा मात्रै एक हजार एक सय २८ संक्रमित थपिएका छन् ।
पछिल्लो २४ घण्टामा कोभिड संक्रमणकै कारण दुई जनाको मृत्यु भएको मन्त्रालयकी प्रवक्ता डा. संगीता मिश्राले जानकारी दिएकी छन् ।
हाल भेन्टिलेटरमा रहनेको सङ्ख्या २२ र आइसियुमा ८७ जना उपचाररत छन् । होम आइसोलेसनमा १० हजार ९१०, संस्थागत आइसोलेसनमा ८८० र संस्थागत क्वारेन्टिनमा ६९५ जना संक्रमित छन् ।
सरकारले खोप कार्यक्रम विस्तार गर्न लागेको प्रवक्ता डा. मिश्राले बताइन् । पुस मसान्तसम्म दुई तिहाइलाई खोप लगाउने लक्ष्य लिइएकामा बागमती र गण्डकी प्रदेशमा लक्ष्यअनुसार लगाइसकिएको उनले जानकारी दिइन्। ‘पहिले खोप लगाइसकेका नागरिकलाई माघ महिनाको पहिलो साताबाट ‘बुस्टर’ डोज लगाउँछौं,’ डा. मिश्राले भनिन्, ‘पहिले जुन खोप लगाउनुभएको हो त्यही ‘बुस्टर’ लगाउनुपर्छ ।’
