एनएमएले सुरु गर्यो ‘लेट्स ब्राण्ड नेपाल’
नेप्लिज मार्केटिङ एसोसिएसन(एनएमए)ले ‘लेट्स ब्राण्ड नेपाल’ अभियान सुरु गरेको छ । आज (बिहिबार) काठमाडौंको सोल्टी होटलमा आयोजित एनएमएको उद्घाटन समारोहका बीच एनएमएले उक्त अभियान सुरु गरेको हो ।
अभियानले नेपालको राष्ट्रिय पहिचानलाई विश्वव्यापिकरण गर्ने लक्ष्य राखेको छ । नेपाली सेवा तथा वस्तुको प्रचारप्रसारमा हुँदै आएको परम्परागत परिपाटीलाई हटाउँदै मार्केटिङको अत्याधुनिक शैलीलाई अवलम्बन गर्ने यो अभियानको उद्धेश्य रहेको बताइएको छ । नेपालको मार्केटिङ शैलीलाई अन्तर्राष्ट्रिय मापदण्डअनुरुप पुर्याउन यो अभियानले सहयोगी भूमिका खेल्ने जनाइएको छ ।
