अञ्जलीका फ्यान – अँगालो हालेर रुनेदेखि डराएर काम्नेसम्म
नेपाली सांगीतिक क्षेत्रकी चर्चित मोडल हुन्– अञ्जली अधिकारी । ‘बोल माया’ ‘गलबन्दी’ ‘बनकी चरी’ जस्ता गीतको भिडियोबाट थप चर्चामा आएकी अधिकारीको फ्यान फलोइङ असाध्यै राम्रो छ । तिनै फ्यानलाई उनी यसरी सम्झन्छिन् :
अङ्गालो हालेर रुने ति आमा
एउटा कार्यक्रमको लागि केही वर्ष अघि बेल्जियम गएको थिएँ । त्यतिबेला बोल माया गीत चर्चामा थियो । कार्यक्रम सिध्याएर केही समय बाँकी रह्यो । त्यसैले घुम्न निस्किएको थिएँ । बाटोमा एकजना वृद्धा आमासँग मेरो भेट भयो । उहाँ मेरो नजिक आउनुभयो र मलाई अङ्गालो हालेर रुन थाल्नु भयो । मलाई तिमी साह्रै मन पर्छ भन्दै डाँको छोडेर रुन थाल्नुभयो । उहाँले भर्खरै ‘बोल माया’ गीत हेर्नु भएको रहेछ । मैले आमालाई नरुन आग्रह गरेँ उहाँ रोएको देखेर म पनि भाबुक भएको थिएँ ।
म नजिक जाँदा काम्ने फ्यान
कतै कार्यक्रममा जाँदा फोटो खिच्न र बोल्न नजिक आउने फ्यानहरु धेरै हुन्छन् । ति मध्ये केही फ्यानहरु अनौठा हुन्छन् । काठमाडौँमै एउटा कार्यक्रममा एकजना फ्यानसँग मेरो भेट भयो । उहाँ मेरो नजिक उभिरहनु भएको थियो । म तिर हेर्दै कामिरहनुभएको थियो । बोल्न पनि खोज्दै हुनुहुन्थो तर, डराएर बोल्न सक्नुभएन । उहाँ पनि मलाई अलि अनौठो नै लागेको थियो ।
मेरो सानो–सानो कुराको पनि ख्याल राख्ने फ्यान
एकजना फ्यान हुनुहुन्छ उहाँलाई मेरो बर्थडे, म बिरामी भएको, मेरो नयाँ म्यजिक भिडियो रिलिज भएको देखि लिएर प्रायः सबै कुरा थाहा हुन्छ । कसरी थाहा पाउनुहुन्छ होला भनेर म आफैँ अचम्ममा पर्छु । मेरो बर्थडेको दिन पनि उहाँले ठ्याक्कै १२ बजे शुभकामना दिनुभएको थियो । म बिरामी भएको बेला पनि टेक केयर भनेर म्यासेज गर्नु हुन्छ । यस्तो माया गर्ने फ्यान देख्दा खुशी लाग्छ ।
सुटिङमा गिफ्ट लिएर भेट्न आउने फ्यान
एउटा म्युजिक भिडियोको सुटिङ्गको क्रममा एकजना फ्यान मलाई भेट्न आउनु भएको थियो । टेकमा व्यस्त भएको कारण मैले लगभग १ घन्टा उहाँलाई भेट्न भ्याइन । टेक सकाएर हेर्दा एक घन्टासम्म पनि उहाँ मलाई भेट्नको लागि कुरेर बस्नु भएको रहेछ । म उहाँलाई भेट्न गएँ । उहाँको हातमा एउटा गिफ्ट थियो । त्यो गिफ्ट मलाई दिदैँ उहाँले भन्नुभयो म तपाईको ठूलो फ्यान होनी । मेरो फोटोहरु फ्रेम गरेर उहाँले मलाई गिफ्ट दिनु भएको रहेछ । जुन फ्रेमलाई मैले सजाएर राखेकी छु ।
