घरमै यसरी बनाउनुस् मीठो खीर

चामल र दूधबाट बनाइने शुद्ध परिकार हो– खीर । व्रत बस्दा होस् या कुनै पूजा गर्न यसकोे प्रयोग हुन्छ । अझै साउन १५ मा अधिकांशको घरमा खीर पाक्छ । त्यसो त खीर नचाखेका नेपाली कमै होलान् । तर मीठो खीर कसरी पकाउन सकिन्छ ? सबैको चासोको विषय हुन सक्छ । यही विषयमा हाम्रो थकाली भान्सा घरकी कुक यमुना तुलाचन शेरचनले ५/६ जनाका लागि मीठो खीर पकाउनका लागि दिएको सुझाव यस्तो छ :

खीर बनाउन आवश्यक सामग्री

– ३ लिटर दूध
– १ पाउ टाइचिन चामल (२०० ग्राम)
– घ्यु
– ड्राइ फुड (किसमिश, काजु आदी)
– चिनी
– ल्वाङ, सुकमेल, मरिच र दालचिनीको धुलो आवश्यकता अनुसार
– काटेर टुक्रा–टुक्रा पारेको नरिवल

खीर बनाउने तरिका

– सबैभन्दा पहिले चामल केलाएर सफा पारेर धोएर पानीबाट निकालेर ५ मिनेट राख्ने
– दूधलाई राम्ररी उम्लिने गरी तताउने
– उम्लिरहेको दूधमा चामल हालेर चलाउँदै पकाउने ।
– चामल पाकेपछि त्यसमा स्वाद अनुसार घ्यू र चिनी राख्ने ।
– चिनी राम्ररी घुलिसकेपछि त्यसमा नरिवलको टुक्रा, काजु, किसमिस मिसाएर केही मिनेट पकाउने
– जब खीर पाक्छ, तब त्यसमा ल्वाङ, सुकमेल, मरिच र दालचिनीको धुलो हालेर दुई मिनेटजति पकाएर आगो निभाउने