प्रतिष्ठानको भवन अब कोरोना आइसोलेसन

कोरोना संक्रमित कलाकर्मीहरुले राष्ट्रिय लोक तथा दोहोरीगीत प्रतिष्ठानको भवन आइसोलेसन वार्डका रुपमा प्रयोग गर्न सक्नेछन् । थुप्रै कलाकर्मी कोरोना संक्रमित बन्दै गएकामा चिन्ता व्यक्त गर्दै प्रतिष्ठानले भाडाका घरमा बस्न अप्ठ्यारो परे आफ्नो भवनलाई आइसोलेसन सेन्टरका रुपमा प्रयोग गर्न सक्ने विज्ञप्तिमार्फत् जनाएको छ ।

प्रतिष्ठानले संक्रमित कलाकर्मीहरुको शिघ्र स्वास्थ्य लाभको कामना गर्दै सबैलाई सुरक्षित रहन समेत आह्वान गरेको छ । रिता थापा मगर संयोजक रहने गरी प्रतिष्ठानले कोभिड १९ आकस्मिक सहयोग समिति समेत गठन गरेको छ ।

लोकदोहोरी क्षेत्रका दर्जनबढी कलाकार कोरोना संक्रमित रहेको प्रतिष्ठानका अध्यक्ष रमेश बिजीले बताए । यसमध्ये अधिकांश कोठा भाडामा बस्नेहरु भएकाले उनीहरुलाई अप्ठ्यारो नपरोस् भन्ने हेतु प्रतिष्ठानको भवनलाई आइसोलेसन बनाउने निर्णय गरिएको बिजीले बताए ।

‘प्रतिष्ठानको भवनमा २० जनासम्म बस्न मिल्छ,’ उनले भने, ‘किचन, पानी र सिरक, डस्नाको पनि सुविधा छ ।’ प्रतिष्ठानले अघिल्लो लकडाउनमा पनि संक्रमित १० कलाकारलाई प्रतिव्यक्ति ११ हजार रुपैयाँ र खाद्यान्न सहयोग गरेको थियो ।