सामाजिक कार्यअन्तर्गत वी विल राइजको सहयोग

वी विल राइज फाउन्डेसनले गैरआवासीय नेपाली संघ (एनआरएनए) हङकङलाई दुई हजार थान ‘कोरोना र्यापिड टेस्ट किट’ हस्तान्तरण गरेको छ । प्रतिगोटा हङकङ डलर ५० पर्ने करिब १६ लाख नेपाली रुपैयाँको उक्त टेस्ट किट एनआरएनएले नेपाली समुदायलाई वितरण गर्नेछ ।

हङकङस्थित एनआरएनए कार्यालयमा बिहीबार आयोजित कार्यक्रममा फाउन्डेसनका निर्देशक सुरज गुरुङले एनआरएनएनए, हङकङका अध्यक्ष गोकर्ण ढकाललाई उक्त सहयोग हस्तान्तरण गरेका हुन् ।

हङकङ तेक्वान्दो एसोसिएनका अध्यक्ष एन्थोनी सेक होङ चुङको सहयोग र फाउन्डेसनको पहलमा उक्त किट प्राप्त भएको हो । प्राप्त किट आइतबारबाट वितरण गरिने अध्यक्ष ढकालले बताए ।

किट अत्यावश्यक भएका व्यक्तिले एनआरएनए, हङकङको ह्वाट्सएप हटलाइन ००८५२–९१९६९११७ मा मेसेज गर्नुपर्ने जनाइएको छ । प्रतिपरिवारले चार वटाका दरले किट प्राप्त गर्नेछन् ।

यसअघि, पनि एनआरएनएले २२ सय थान टेस्ट किट नेपाली समुदायलाई वितरण गरेको निवर्तमान अध्यक्ष टिका गुरुङले बताइन् । व्यापक कोरोना कहरका कारण यतिबेला किटको अत्यधिक माग रहेको उनले जनाइन् ।

कोरोना महामारीले आक्रान्त हङकङमा पछिल्लो समय ५ लाख ७६ हजार संक्रमित पुगेका छन् । कोरोनाबाट ज्यान गुमाउनेको संख्या ३ हजार १ सय ५० पुगेको छ । कोरोना महामारीको पीडादायी अवस्थाबाट ग्रुजिरहेको हङकङका नेपाली समुदायलाई यसबाट सचेत रहन सहयोग पुगोस् भन्ने हेतुका साथ पहल गरिएको फाउन्डेसनका संस्थापक अध्यक्ष तुलसी गुरुङले बताए ।

गतवर्ष भदौमा कोरोना कहरका बीच फाउन्डेसनले नेपाल सरकारलाई ५० थान अक्सिजन कन्सन्ट्रेटर सहयोगस्वरूप हस्तान्तरण गरेको थियो । हङकङस्थित सिल्क रोड इन्टरनेसनल फाउन्डेसनको सहयोग र वी विल राइजको सहकार्यमा करिब ५० लाख रुपैयाँ बराबरको उक्त सामग्री प्रदान गरिएको हो ।

२०७२ को महाभूकम्पपछि स्थापित फाउन्डेसनले विभिन्न सामाजिक कार्य गर्दै आएको छ । सिन्धुपाल्चोकको कर्थलीमा भूकम्पले ध्वस्त पारेका घर र विद्यालयको पुनर्निर्माण गर्दै सामाजिक कार्यको प्रारम्भ गरेको यो संस्थाले पर्यटन प्रवद्र्धनका निम्ति देश तथा विदेशमा विभिन्न कार्यक्रम गर्दै आएको छ । ‘मेरो गाउँ मेरो ठाउँ’ भिडियो च्यालेन्ज, हङकङ र बेलायतमा हुने ‘हाइक फर नेपाल’ लगायतका कार्यक्रम पनि फाउन्डेसनले नै आयोजना गरेको थियो ।

तस्बिरहरू : जगत अम्बु गुरुङ/हङकङ

यो पनि…
सगरमाथा चढ्न वि विल राइजद्वारा आङरिताका नातिलाई आर्थिक सहयोग
राइज मिडियाका अध्यक्ष गुरुङ ‘प्रबल जनसेवा श्री चतुर्थ’ बाट सम्मानित