राइज मिडिया नेटवर्कको महाप्रबन्धकमा धिरेन्द्र पन्त

राइज मिडिया नेटवर्कको महाप्रबन्धक (सेल्स एण्ड मार्केटिङ) मा धिरेन्द्र पन्त नियुक्त भएका छन् । पन्तलाई आइतबार नेटवर्कका कार्यकारी निर्देशक-प्रमुख कार्यकारी अधिकृत (सीईओ) निर्मल श्रेष्ठ, प्रधानसम्पादक सन्तोष आचार्य, निर्देशक सुनीता दुलाल, बोर्ड सदस्यद्वय खड्ग परियार, फुर्वा तेन्जिङ शेर्पा लगायतले स्वागत गरेका हुन् ।

पन्त २३ वर्षयता बैंकिङ र रेमिट्यान्स क्षेत्रमा सक्रिय थिए । उनीसँग एनसिसि बैंक, हिमालयन बैंक, सेन्चुरी कमर्सियल बैंक, ग्राण्ड बैंक (हालको प्रभु बैंक), बुम रेमिट लगायत विभिन्न संस्थामा काम गरेको अनुभव छ । विगत तीन वर्षयता पन्त रेमिट्यान्स परामर्शदाताको रूपमा पनि काम गर्दै आएका थिए । पन्तले फाइनान्स, मार्केटिङ र मानव संशाधनमा डबल स्नातकोत्तर गरेका छन् ।

पन्तलाई स्वागत गर्दै कम्पनीका सिईओ श्रेष्ठले नेटवर्कलाई बजारीकरण र प्रवद्र्धन गर्न महत्वपूर्ण भूमिका खेल्ने विश्वास व्यक्त गरे । ‘उहाँको २३ वर्ष लामो बैंकिङ क्षेत्रको अनुभव हाम्रा लागि कोसेढुंगा बन्नेछ,’ श्रेष्ठले भने ।

यसैगरी, नेटवर्कद्वारा सञ्चालित मेरोलाइफस्टाइलका प्रधानसम्पादक आचार्यले धिरेन्द्रको आगमनले कम्पनीको वृद्धि विकासमा सघाउ पुग्ने बताए। त्यस्तै, निर्देशक दुलालले पन्तलाई स्वागत गर्दै ‘उहाँको अनुभवको लाभ नेटवर्कले लिने,’ विश्वास व्यक्त गरिन् ।