कोरोना संत्रास बढेपछि जमघट नगर्न सरकारको अनुरोध
स्वास्थ्य तथा जनसङ्ख्या मन्त्रालयले छिमेकी मुलुकहरूमा कोरोनाको त्रास बढ्दै गएकाले नेपालमा पनि भिडभाड हुने कार्य नगर्न अनुरोध गरेको छ ।
मन्त्रालयले आइतबार एक विज्ञप्ति जारी गर्दै केही हप्तायता छिमेकी देशहरूमा कोभिड–१९ को सङ्क्रमण तीव्र रूपमा बढिरहेको र नेपालमा पनि सङ्क्रमण बढ्न सक्ने अवस्था रहेकाले भिडभाड नगर्न/नगराउन आग्रह गरेको हो ।
यति बेला भारत र चीनमा सङ्क्रमितको सङ्ख्या बढ्दै गएको छ । त्यसैले नेपालमा समेत सङ्क्रमण दर बढ्न सक्ने अवस्थालाई देखेर देशभर सभा, जुलुस, र्याली, भेला, जमघट, गोष्ठी, सेमिनार, बैठक र भिडभाड हुने व्यवसाय नगर्न अनुरोध गरिएको मन्त्रालयका प्रवक्ता प्रा.डा. जागेश्वर गौतमले बताए ।
यसै गरी, सबैले सामाजिक दुरी, मास्कको प्रयोग अनिवार्य गरी जनस्वास्थ्यका मापदण्ड पालना गर्नुपर्ने विज्ञप्तिमा उल्लेख छ ।
