रिजुले जितिन पाँच हजार पाउण्डको ब्रिटिश काउन्सिल आईईएलटीएस पुरस्कार

 रिजु अधिकारी ब्रिटिश काउन्सिलले बर्षेनी आयोजना गर्नेे ‘आईईएलटीएस प्राइज २०२३’ मा पाँच हजार पाउण्ड (आठ लाख ४० हजार रुपैयाँ) को पुरस्कारसहित विजेता बनेकी छन् । उज्ज्वल भेटुवाल २ हजार (नेरू ३ लाख ३६ हजार) सहित दोस्रो र रिशिका शाह १ हजार पाउण्ड (नेरू १ लाख ६८ हजार) सहित तेस्रो भएकी छन् । आफ्नो शैक्षिक सपनालाई वास्तविकतामा बदल्न चाहने महत्वाकांक्षी युवा पुस्ताहरूलाई मद्दत गर्न यस प्रतिस्पर्धामार्फत काउन्सिलले विश्वभरका अंग्रेजी भाषामा पढाइ हुने विश्वविद्यालयमा आईईएलटीएसका परीक्षार्थीहरूलाई ५ हजार डलर (८ लाख ४० हजार नेरू) सम्मको ट्युशन शुल्कमा टेवा दिनेछ । यो वर्षको प्रतिस्पर्धा चीन, जापान, हङकङ, इन्डोनेशिया, कोरिया, मलेशिया, फिलिपिन्स, सिंगापुर ताइवान, थाइल्यान्ड, भियतनाम, बंगलादेश पाकिस्तान, नेपाल र श्रीलंकाबाट आईईएलटीएसको परीक्षा दिएका परीक्षार्थीका लागि खुला गरिएको थियो । प्रतिस्पर्धात्मक आवेदन प्रक्रियामार्फत तीन जना विजेताहरूको नाम चयन गरिएको हो ।

यसबाहेक पनि ब्रिटिश काउन्सिलमा दर्ता भएर सन् २०२३ को सेप्टेम्बर १ देखि नोभेम्बर ३० को बीचमा आईएलटीएसको परीक्षा दिएका परीक्षार्थीहरूमध्ये केही भाग्यशाली विजेताहरूले आईईएलटीएस उपहार पाएका छन् । ६० वर्षभन्दा बढी समयदेखि नेपालमा कार्यरत ब्रिटिश काउन्सिलले यहाँको शिक्षामा भइरहेका सुधारलाई टेवा दिँदै युवा नेपालीलाई उनीहरूको पूर्ण सम्भावना हासिलका अवसर सृजना गर्दै नेपालको आर्थिक विकास तथा समृद्धिमा योगदान दिइरहेको बताएको छ आईईएलटीएस प्राइजले विद्यार्थीको सपना पूरा गर्न र शैक्षिक लक्ष्य हासिलमा मद्दत गर्ने आशा लिएको ब्रिटिश काउन्सिल नेपालका देशीय निर्देशक शाहिदा म्याकडगलले बताएकी छन् ।