एसएसबीले महाकालीको तुइन हटायो
भारतीय सीमा सुरक्षा बल एसएसबीले दार्चुलाको व्यास गाउँपालिका क्षेत्रमा महाकाली नदीमाथि लगाइएका तुइनहरू हटाएको छ । विगत तीन दिनदेखि तुइन लगाएको क्षेत्रमा एसएसबीले दैनिकरूपमा ड्युटी गर्न थालेको व्यास गाउँपालिका-४ का स्थानीय एवम् वडा सदस्य प्रेमसिंह धामीले जानकारी दिए ।
दार्चुला सदरमुकाम खलंगा बजार आवतजावत गर्न व्यासका स्थानीयले महाकाली नदीमाथि तुइन तरेर भारतीय सडकको प्रयोग गर्ने गरेका छन् । नेपालतर्फ राम्रो सडक नहुदाँ भारतीय बाटो प्रयोग गर्न स्थानीयहरू बाध्य रहेको वडा सदस्य धामीको भनाइ छ ।
‘नेपालको बाटो भएर सदरमुकाम झर्न एकदिन हिँड्नुपर्छ,’ उनले भने । तत्काल अस्पताल पुर्याउनुपर्ने बिरामीदेखि दैनिक उपभोग्य समान किनमेल गर्न भारतको बाटो प्रयोग गर्नुपर्ने अवस्थाले पछिल्लो समय तुइन हटाइँदा समस्या भएको छ ।
मलघट्टेको पुल निर्माण सम्पन्न भएकाले जनताको सहजताका लागि सञ्चालनमा ल्याइनुपर्ने उनको भनाइ छ । केही व्यक्तिहरू गेट बन्द गरिएको पुलबाट हाम फालेर आवतजावत गरिरहेकाले यसले झन दुर्घटनाको जोखिम निम्त्याएको छ ।
दार्चुलाको महाकाली नदीमा तुइनमुक्त कार्यक्रमअन्तर्गत चारवटा सीमापुल निर्माण भइरहेको दार्चुलाका प्रमुख जिल्ला अधिकारी दीर्घराज उपाध्यायले जानकारी दिए । चारपुल मध्ये दुई पुल निर्माण सम्पन्न हुन बाकिँ छन् । पुलहरू प्याकेजमा सञ्चालन गरिने भएकाले निर्माण सम्पन्न भएपनि सञ्चालन गर्न नसकिएको उनको भनाइ छ ।
एक प्याकेजमा मालिकार्जुन गाउँपालिकाको बाकु पुल र बडुगाउँ पुल तथा अर्को प्याकेजमा व्यास गाउँपालिका-२ मा निर्माण भइरहेको भारतको गस्कु र नेपालको माल जोड्ने पुल तथा मलघट्टे पुल रहेका छन् । एउटै प्याकेजमा रहेकापुलहरू निर्माण सम्पन्न भएपछिसँगै सञ्चालनमा आउने प्रमुख जिल्ला अधिकारी उपाध्यायको भनाइ छ ।
बडूगाउँ पुल निर्माण सम्पन्न भएपनि बाकुँ पुल निर्माण सम्पन्न हुन बाँकी छ । त्यसैगरी मलघट्टेको पुल निर्माण सम्पन्न भएपनि मालको पुल निर्माणधिन अवस्थामा रहेकाले सीमापुलहरू सञ्चालन हुन केही समय पर्खिनुपर्ने अवस्था छ ।
एसएसबीले तुइन हटाएको विषयमा आफू जानकार नभएपनि तुइन हटाइनुपर्ने प्रमुख जिल्ला अधिकारी उपाध्यायको भनाइ छ । ‘तुइन जोखिम र असुरक्षित भएकाले हटाइनुपर्छ, तर हाल एसएसबीले तुइन हटाएको विषयमा जानकार छैन’ उनले भने ।
यो पनि
पशुपतिमा महाशिवरात्रिको तयारी तीव्र, साधुसन्तको चहलपहल बढ्यो
