यी हुन् दैनिक एउटा स्याउ खानुका १० फाइदा
स्याउ हाम्रो स्वास्थ्यको लागि एकदम गुणकारी फलफूल हो । स्याउमा शरीरका लागि आवश्यक पर्ने विभिन्न पोषक तत्व रहेका हुन्छन् । वैज्ञानिक अध्ययनले पनि पुष्टि गरेको छ कि स्याउले मुटुरोग, क्यान्सर तथा मधुमेहसँगै विभिन्न खालका मस्तिष्क रोग जस्तै अल्जाइमर तथा पार्किन्सन्स जस्ता रोगबाट समेत बचाउन ठूलो सहयोग गर्छ । दैनिक एउटा स्याउ खाँदा स्वस्थ रहन पनि सहयोग पुर्याउँछ । दैनिक स्याउ खानाले हुने १० फाइदा यसप्रकार छन् ।
जुनसुकै रोगका बिरामीले खान मिल्ने
पोषक तत्वका कारण स्याउले हाम्रो शरीरलाई चाहिने तत्वहरु प्रदान गर्छ । यसमा भिटामिन र खनिज पनि पाइन्छ । स्याउ बिरामी हुँदा खानका लागि उपयोगी फल हो । यो जुनसुकै प्रकारका बिरामीले खान मिल्ने विभिन्न अध्ययनले देखिएको छ ।
मुटु रोगीका लागि फाइदा
मुटु रोगीका लागि स्याउ खानु राम्रो हो । स्याउमा नियासिन र फाइबर पाइन्छ । जसले कोलेस्ट्रोलको लेबललाई कन्ट्रोल गर्दछ । रगतमा चिनीको मात्रा पनि कन्ट्रोल राख्दछ । स्याउ सेवनले मुटुको रक्तनलीको समस्या, मांसपेशीमा हुने समस्या जस्ता घातक समस्यालाई कम गर्छ ।
एनिमियाको उपचारमा सहयोगी
स्याउ खाँदा एनिमियाबाट मुक्त गर्न मद्दत गर्छ । एनिमियाले मानिसको शरीरमा हेमोग्लोबिन कम हुँदै जान्छ । स्याउमा आइरन पर्याप्त मात्रामा पाइन्छ । त्यसैले नियमित स्याउ खाँदा शरीरमा हेमोग्लोबिनको मात्रा बढ्दै जान्छ ।
स्मरण शक्ति बढ्छ
स्याउमा भिटामिन ए, बी, सी, क्याल्सियम, पोटासियम तथा एन्टिअब्सिडेन्ट भरपुर मात्रामा पाइन्छ । यसले मस्तिष्कमा रक्तसञ्चारका लागि महत्वपूर्ण भूमिका निर्वाह गर्छ । स्याउ सेवनले मस्तिष्कमा रहेको तनाव कम गर्छ । यसले स्मरण शक्ति बढाउँछ । दैनिक स्याउ सेवनले अल्जाइमरको खतराबाट मुक्त दिलाउँछ ।
फोक्सोको सफाइ
स्याउको नियमित सेवनले फोक्सोको सफाइमा विशेष भूमिका खेल्छ । पाचन प्रणाली स्वस्थ राख्न यसले मद्दत गर्छ । पेटमा भएका विभिन्न स्वास्थ्य समस्या समाधानमा पनि स्याउले सहयोगी भूमिका निर्वाह गर्छ ।
मिर्गौलाको पत्थरी कम गर्न
स्याउको नियमित सेवनले मिर्गौलाको पत्थरी भएका व्यक्तिलाई सहयोग गर्छ । यसले पत्थरी रोक्ने र स–साना पत्थरीलाई पिसाबको माध्यमबाट बगाउन मद्दत गर्छ ।
निमोनियाको जोखिम कम गर्न
स्याउमा पाइने विभिन्न तत्वले एन्टिब्याटेरियल इम्युन क्षमता बढाएर निमोनियाजस्ता रोगको जोखिम कम गर्छ । यसमा पाइने धेरै प्रकारका खनिज तथा भिटामिनले हाम्रो रोग प्रतिरोधात्मक क्षमतालाई बढावा दिन्छ ।
आँखाको दृष्टि राम्रो
स्याउमा भिटामिन ए पाइन्छ । जसले आँखाको दृष्टि बढाउन मद्दत गर्दछ । दैनिक रुपमा स्याउ खाँदा आँखाको दृष्टि बढ्ने मात्र नभई आँखामा हुने अन्य प्रकारका रोग लाग्ने सम्भावना कम हुन्छ ।
अनुहारमा चमक
स्याउमा एन्टिअक्सिडेन्ट पाइन्छ । जसले अनुहारमा रहेको समस्यालाई समाधान गर्न ठूलो मद्दत गर्दछ । अनुहारमा दाग, धब्बा हुने मान्छेले हरेक दिन एउटा स्याउ खाँदा समस्या समाधान हुन्छ । अनुहारको छालामा पनि चमक आउँछ ।
तौल कम गर्न सहयोग
तौल घटाउनका लागि नियमित डाइटमा दुई वटा स्याउ समावेश गर्न चिकित्सकले सुझाव दिन्छन् । स्याउमा पाइने पोषक तत्वले हाम्रो शरीरलाई बलियो बनाउँछ । स्याउ खाँदा भोक कम लाग्ने र तौल सन्तुलनमा जाने चिकित्सकको दाबी छ ।
